MIRI: Lebih 3,000 iku temuai ari mayuh bengkah endur dirikodka datai raun ngagai Taman Negara Gua Niah ditu ninting taun.
Ketuai Pemesai Eksekutif Opis Kampung Sarawak (SFC) Haji Zolkilpli Mohamad Aton madah, penyampau temuai ke ngelawa Gua Niah betambah ninting taun lalu dipelaba deka terus niki udah tu.
Nya alai, ku iya baka ke udah disebut Kepala Menteri Datuk Patinggi Abang Johari Tun Openg ngelama tu, piak sida begulai enggau Opis Menteri Dagang Temuai enggau Pengeraja Asal Sarawak diatu benung bebendar ngangkatka status taman negara nya nyadi taba pengeraja asal dunya ti diaku Gerempung Pelajar, Main Asal enggau Saintifik Gempung Bansa Dunya (UNESCO).
Iya madah munyi nya rambau Pengerami Bejadika Kimpin Beripai Perdana 2019 di Gua Niah ditu ensana ke dipenyadi Menteri Muda Dagang Temuai, Seni enggau Main Asal Datuk Sebastian Ting.
“Kami (SFC) begulai enggau opis menteri benung bebendar nembuka keretas pansik ngambika Gua Niah dirintai nyadi palan pengeraja asal dunya UNESCO.
“Naka tu semina Mulu aja di Sarawak udah dirintai nyadi taba pengeraja asal dunya UNESCO, nyadi tu ila deka nyadi palan ti kedua,” ku iya.
Tang, tandu Zolkilpli, proses nya beguna awak beberapa taun sebedau iya bulih pemendar.
Kenu ku iya, nyema Gua Niah udah dirintai ila, iya deka nyadi sebengkah japai ke ngemegah menua adap ke menua adat utara Sarawak laban ke udah ngembuan dua iti palan pengeraja asal dunya UNESCO.
Nya alai, Zolkilpli ngelalau mensia mayuh ngambika bela ngemeratka tanggungpengawa nyaga pemanah taman negara nya laban nya endang pesaka ke pemadu berega ngagai rayat Sarawak.
