KUCHING: Anugerah Industri Muzik Ke-25 (AIM25) nyadi kenang manis ti enda suah datai tang meri jereki ngagai Biduani ta Negara, Datuk Seri Siti Nurhaliza enggau semua raban album Gema Bumantara.
Siti mega madahka diri nyadi saksi album nya mujur diaku ari lima chalun ke bukai.
“Taja pen aku enda ulih ngemai semua niki atas panggau, tang aku chukup ngenang semua produser, komposer, penengkebang leka lagu sereta bala bukai ti ngemujur album tu.
“Terima kasih ngagai Opis Menteri Komunikasyen nengah @mycreativeventures ke sukung ngagai pemansang industri kreatif menua nengah Turu Konten Kreatif – Turu Pengelaku Makit (Domestik) 2.0 ungkup sekeda lagu dalam album tu.
“Tabi puji nuju SN Legacy, Siti Nurhaliza Productions enggau Universal Music ti nyadi produser begulai ungkup lagu tu.
“Aram kitai bela ngerami semua sereta naka ulih ngenkebang lagu dikena ngemansang industri muzik menua!” ku Siti.
Ke rikod, Siti mujur ngempu trofi Kategori Lagu Pemadu Manah seraya ngentapka status iya nyadi ikon muzik menua.
Iya menang kategori nya nengah lagu Pesanan Buat Diri ti bela nguasa Kategori Lagu Tradisional Pemadu Manah.
Penyanyi tebilang nya mega menang Kategori Vokal Indu Pemadu Manah nengah lagu Kesuma enggau Kolaborasyen Artis/Penengkebang Leka Lagu Begulai Enggau Artis/ Penengkebang Lagu Menua Luar Pemadu Manah.
Lagu Cenderamaya nya asil tengkebang penyanyi enggau produser lagu Singapore, Anmi Musfirah begulai enggau dua bakih iya lebih belajar di Kolej Muzik Berklee, Amerika Syarikat, iya nya Irena Taib enggau Jamilah Abu Bakar.
Lagu Cenderamaya mega mujur ngalahka lagu tebilang industri muzik rantau tu nyengkaum Melly Goeslaw (Jenjang Cinta), Ernie Zakri (Nostalgia), Lesti Kejora (Kumbang Bunga), Fabio Asher enggau Aina Abdul (Sesaaf).
