Lenya Cadbuzai siti ari nama kek baru digaga Lily Jackson

BESERIMBAI enggau Hari Orang Indu ke diintu sehari tu, Suara Sarawak udah ngerandau siku tukang kek benama Lily Jackson pasal berita pemadu baru ari iya.

Apin lama, Lily udah ngaga kek baru diberi nama Lenya Cadbuzai lalu kek tu ukai dipeda ngembuan nama ke nyelai tang bisi reti enggau kebuah Lily ngaga kek baka nya.

Lebuh dirandau, Lily madahka Lenya Cadbuzai nya entara kek baru digaga iya.

“Nama kek baru tu dikumbai Lenya Cadbuzai laban bisi sejarah kediri lalu lama aku udah deka ngena nama nya tang apin tetemuka kereban dikena ngaga kek ngena nama nya tadi.

“Lenya Cadbuzai tu siku indu bajik lumur dua dalam jerita tuai raban bansa Kejaman/ Sekapan (Kajang).

BEKUNSIKA PENEMU… Gambar Lily lebuh ngajar sida ke masuk kelas belajar ngaga kek diatur Lily.

“Dara bajik tu nya ngembuan ulah ti mangah sereta beberita jai ulah lalu bisi ngembuan pengaruh.

“Lenya tu mega suah berundingka chara ngerampas penuduk ari dara bajik ke lumur satu.

“Nya kebuah suah amat kami besebutka jaku munyi tu ‘LENYA CADBUZAI PUUN ICENG BELABERAI PUUN KEBEB BELASAZAI’ (jaku Kejaman), reti iya Lenya tu siku orang ti suah ngena gari gap tang enda manah dipeda lalu suah ngena sumpin besai-besai,” ku Lily nerang pasal sejarah asal nya.

Sebedau tu, Lily kala ngaga kek lapis Pua Kumbu, Sweet Paddle Pop, Ivory, Purple Rose, Lakin Belaga enggau ke bukai.

Penerang silik pasal dagang kek pemadu baru ari Lily tu, tau ngelawa ruai Facebook 1n5l Kek Lapis.

LENYA CADBUZAI… Entara kek baru digaga Lily.

PENGAWA DIKERINDU

Sebedau tu, Suara Sarawak kala ngerandau Lily pasal dagang kek pengudah kek lapis Pua Kumbu ti ayan sebelah media rama.

Sekali tu, kitai deka nemu silik pasal kek Lenya Cadbuzai ti baru digaga Lily tu baka chara enggau timpuh ngaga kek nya.

Ku Lily, pengawa ngaga kek Lenya Cadbuzai tu nadai mayuh kelikuh kelimpah digaga pengelama dua ngagai tiga jam aja.

“Ari sukut ngaga lapis kek nya, aku ngena Teknik Pop Art lalu chura iya ngena chura testier, chura bechampur enggau chura sekunder.

“Kek ti ngundan chokelit nya mesti disirap belubah lalu mesti nemu chara ti betul ngambi kek nya enda anchur.

“Taja baru seminggu aku mantaika kek Lenya tu, tang mayuh orang deka belajarka chara ngaga kek tu laban rindu ninga nama kek ke nyelai tu,” ku Lily seraya madahka diri berasai gaga laban kek baru tu nerima timbal ke chukup manah.

Nya kebuah, beserimbai enggau Hari Indu sehari tu, Lily deka ngatur kelas online berengkah pukul 12 tengahari 7 March tu nyentuk 12 tengah malam kena 12 March tu.

“Sida ke deka belajarka chara ngaga kek tu, dipinta mayar RM150 ungkup kelas online ngaga kek Lenya.

“Sida ti rejister deka masuk kelas online mega deka diajar tiga bansa kek baru iya nya Kek Greemn Tea Latte, De’Luna enggau Lenya Cadbuzai.

“Sida ti masuk kelas online tu mega deka diberi dua bup resepi Vol 1 & 2.

“Kelas online tu ditatak ngagai 20 iku aja beserimbai enggau Hari Indu, nya alai anang enda ngerebut peluang ke jarang diatur kami tu,” ku iya nerang. seraya sida ti deka masuk kelas online ngaga kek tu tau whatsapp ngagai lumur 0102395722.

REBUT PELUANG… Raban indu dipinta ngerebut peluang masuk kelas online diatur Lily beserimbai enggau Hari Indu tu.

MAKIN MAJU

Berambaika jaku #choosetochallenge, Lily madahka raban indu diatu majak berani enggau mansang nipakka pemansang dunya moden.

Nambahka nya ku iya, indu diatu mayuh udah mangku pengawa besai, nyadi ketuai, pengajar, pedagang enggau pengawa bukai sebaka enggau sida ke lelaki.

“Sebedau nya, aku meri besai terima kasih ngagai Suara Sarawak laban meri peluang ngagai aku bekunsika penemu beserimbai enggau Hari Indu sehari tu.

“Agi jauh pejalai aku ba dagang kek tu tang aku deka bekunsika mimit peneleba diri napi penguji ngambi ngemansangka diri enggau dagang ke dikeingin ati tu.

“Genap mensia mesti berani enggau kering napi penguji ba pengidup laban kitai ngembuan tuju enggau juluk ati ba pengidup, reti iya bisi utai deka dijapai kitai dikena ngemansangka diri baka orang bukai.

“Ba aku empu, keterubah aku mesti berani napi penguji ngambi nyapai juluk ati kelebih agi lebuh kitai mesti nelebaka diri enggau chara idup baru.

“Kitai mesti besabar enggau nelebaka diri baka diatu, pengidup ba chara tu kitai mayuh bepanggai ngagai media rama.

“Nya alai, uji berundingka chara sereta nelebaka diri ngena media rama enggau teknologi digital ngambi kitai ulih nyingkang baka orang bukai sereta ngemansangka dagang nengah inisiatif baru.

“Teknologi digital udah ngemuntangka pengawa kelebih agi ba pengawa dagang laban ngembuan mayuh pelasar baka media rama.

“Nengah pelasar media rama baka Facebook, Instagram enggau Whatsapp tu mih bala pedagang ngelakuka produk sida,” ku Lily nerang pemanah media rama kelimpah bala pedagang diatu ulih bedagang ari rumah aja.

Lily ngelalau anang takut ngujika pengawa dikeingin ati laban kitai enda nemu penau diri seagi enda nguji.

Nangkan nya, iya madahka kitai anang takutka pengawa nya puntan laban ari pemuntan nya mih kitai ulih belajar ari pengilap diri sereta bebendar agi ngiga inisiatif bukai ngambi nempa mayuh agi pemujur.

“Ari peneleba diri ngepunka dagang kek lapis, keterubah suba aku semina ngena siti hand mixer enggau siti oven lalu semina nerima udar ari bala bakih enggau kaban belayan.

“Tang ari nya tadi, aku berundingka chara baka ni deka ngerembaika dagang tu baka pelasar ke manah dikena ngelakuka produk tu.

“Pia mega, raban indu anang mantul ngapa ba genap pengawa dikereja kitai lalu mesti berani napi penguji ke deka nyadi dudi hari.

“Nya alai, aku ngelalau raban indu sekalika indai orang, bini orang tauka nembiak, sama mih kitai kering enggau liat ati napi penguji. Selamat Hari Orang Indu Sedunya,” ku Lily nyimpul randau enggau Suara Sarawak beserimbai enggau Hari Indu sehari tu.

Suara Sarawak