KUALA LUMPUR: Konvensyen Nembiak Penyerakup tadi ngenuku Juluk Nembiak Penyerakup ti ngangkat pemutus seati, pengempung enggau penegap ba bemacham pekara dikena nempa menua bansa ti teguh.
Juluk berambaika jaku ‘Bina Bersama’ nya mungkur lima juluk iya nya pemutus politik ti seati, penyerakup nasional, ekonomi nembiak, nyamin pekara rama sereta pemeruan enggau penegap ekonomi rama.
Pengawa Bejadi Juluk Nembiak Penyerakup nya dikemata Sapit Menteri Besai, Datuk Seri Fadillah Yusof ke nyadi pengawa pemadu beguna ba aum nya nyerumba Aum Nasional Perintah Penyerakup 2023 ba Balai Tun Dr Ismail, Palan Dagang Dunya Kuala Lumpur (WTCKL), ditu tadi.
Sebedau nya, juluk nya disain Tuai Wira Warisan, Mohd Ismail Ayob, Tuai Nembiak Gempung Rayat Sabah (GRS), Jonnybone Kurum, Sapit Tuai Nembiak Gempung Parti Sarawak (GPS), Lukanisman Awang Sauni, Tuai Angkatan Muda Harapan, Dr Kelvin Yii Lee Wuen enggau Chairman Nembiak Barisan Nasional (BN), Dr Muhamad Akmal Saleh.
Nengah pemutus politik ti seati ulih dijapai enggau nempa pemutus bebasa ke Konstitusyen Perintah Besai dikena ngetan ke komuniti pupu bansa ti talukka menua sereta begempung ba pengawa nempa menua bansa ti merintah diri sereta bisi peninggi pendiau.
Ba pekara penyerakup nasional, iya bepelasar ke pemanah basa enggau pengasih sereta bebasa ke bemacham pendiau enggau budaya ti nyadi pelasar pugu nempa Malaysia.
