Lima kubu sejarah di Sarawak

Kubu Slyvia di Kapit

Kubu tu digaga taun 1880 di Kapit ngangkatka nama bini Rajah Charles Vyner Brooke iya nya Rani Slyvia Brooke. Dalam taun 1960-an kelia kubu tu kala nyadi Opis Pelilih enggau Rumah Kort kelimpah nyadi Opis Residen Bagi Menua Kapit ba 1973.

Kubu Lily di Betong

Kubu tu diatu beumur 162 taun digaga dalam taun 1858 di Pelilih Betong. Diatu kubu tu udah digaga Opis Muzium Sarawak manah nengah Program Ngintu enggau Ngibun Kubu Sejarah. Kubu tu kelia digaga dikena Brooke matahka serang bujang berani Iban iya nya Rentap.

Kubu Emma di Kanowit

Kubu tu digaga ba Pelilih Kanowit urung taun 1851 ngangkatka nama menyadi indu Rajah James Brooke. Tuju kubu tu digaga kelia dikena ngetanka diri ari kena serang bujang berani Iban ari Ulu Rejang enggau orang Rajang-Melanau sereta bala bukai ba sepanjai sungai nya. Diatu kubu tu udah digaga perintah manah nengah ungkus RM5 juta dibaruh projek Langgur Pemansang Malaysia Lumpar Ke-11.

Kubu Alice di Sri Aman

Kubu tu bepalan ba pelilih Sri Aman lalu seruran ditapatka bala temuai. Bisi dua ringkat lalu lalu pelin segi empat. Didiri nungga Sungai Batang Lupar ba tebing bukit ke renjan. Ba tisi sepiak kanan enggau kiba kubu tu bisi sebuah menara ke tinggi. Asal kubu tu kebendar ari kubu James di pelilih Skrang digaga taun 1849 sebedau dipindah ngagai Sri Aman taun 1864. Udah nya, kubu tu digaga baru ngena belanja RM1, 011,111 taun 1870 ngangkatka nama bini Rajah empu iya nya Ranee Margaret Alice.

Kubu Margherita di Kuching

Kubu tu digaga ba seberai Tebing Sungai Kuching urung taun 1879 jeman Sarawak dipegai Rajah Charles Brooke. Nama kubu tu digaga ngangkatka nama bini Rajah Charles iya nya Rani Margaret. Pelin kubu tu digaga baka pendiau astana dikena ngelindung sida ari kena serang raban bujang berani tauka bala tuai-tuai kayau kelia. Kubu tu kala nyadi Muzium Polis ba taun 1971 sebedau diserah baru ngagai perintah nengeri sereta dikemanah baka ke seharitu.

Suara Sarawak