Loudness Empire datai baru enggau lagu Nyelai

LOUDNESS Empire datai enggau single baru diberi nama ‘Nyelai’ ungkup bala peminat ti lama udah tetengapka patah nyawa enggau tiun lagu sida.

Lesley Ugil, siku ari kaban band tu madah, lagu Nyelai ditengkebang penanyi sida empu lalu disadang ulih diterima bala peminat baka lagu tebilang disadaka sida sebedau tu.

“Kami andal amat lagu Nyelai tu deka lalu ulih diterima bala peninga enggau peminat baka lagu kami ke udah-udah.
“Tu nyengkaum lagu Pengerindu Nadai Penyangkai enggau Tinggal Kenang ti mujur ngangkatka nama Loudness

Empire ba dunya industri muzik Dayak,” ku iya lebuh dirandau Suara Sarawak.

Ku iya, lagu ‘Nyelai’ ke mega single baru sida diatu benung dalam proses rekoding.

SUKUNG PEMINAT… Lesley madahka sukung bala peminat ngujungka sida ulih datai ba renggat Semifinal ACSJ 2017 ba Kapit.

Raban Loudness Empire

Loudness Empire entara penanyi beraban ke chukup tebilang ba industri muzik Dayak di menua tu ti pegari nama nengah leka lagu enggau tiun ditengkebang sida empu.

Band tu datai ari lima iku diri sebakih, diketuaika Christopher (vokalis) asal ari Long Linai Miri enggau ngajar ba Sekula Sekondari (SMK) Temenggong Lawai Jau, Long San Baram seraya Lesley Ugil (gitaris) peranak Lubok Antu lalu gawa kediri.

Estefan Balan (drummer) ari Uma Badang Apau Koyan, Belaga ke nyadi kaunsilor ba SMK Saint Columbia, Miri lalu Adrary Sandom (bass) ti semenua enggau Lesley enggau gawa ba kompeni peribit.
Kaban band kepenudi iya nya Frankie Sana (gitaris), orang Batu Niah, Miri ti mega pengajar ba SMK Saint Joseph, Miri.

JERITA DALAM LAGU

Ku iya, leka lagu ditengkebang sida ngelama tu endang bisi jerita enggau reti dalam ba pengidup siku-siku mensia.
“Sema jaku, reti leka lagu nya ulih diasai, disagam enggau ngemantupka ati ti sinu, lelenggau tauka gaga.

“Utai diasai siku-siku enda sebaka, bisi nya nyadika pengingat enggau kenang, tau mega ke lalau pengidup nuju pengelurus enggau meri penampak ba dunya nyata,” Lesley nampung randau silik agi.

Nambahka nya, lagu ‘Nyelai’ tu bisi pengelebih enggau bebida ari lagu ke kala ditengkebang sebedau tu.
Nya kebuah ku Lesley, genap lagu ditengkebang raban sida mujur enggau ulih diterima bala peminat ba selampur menua.

KENANG… Gambar raban Loudness Empire ba Anugerah Muzik Dayak (AMD) ba taun 2014, ari kiba Frankie, Adrary, Christopher, Estefan enggau Lesley.

DUNYA PEMERINDANG

Loudness Empire ditumbuh dalam taun 2011 diatu udah manggai semilan taun dalam industri muzik Dayak, tau dikemegah laban mujur ngangkatka seni muzik menua tu.

Ungkup penerang semua, band Loudness Empire mujur ngeluarka album diberi nama Pengerindu Nadai Penyangkai dalam taun 2014.

“Album tu ngundan tujuh buah lagu iya nya Pengerindu Nadai Penyangkai, Sulu, Nadai Ganti, Pechaya, Nyingkang Mansang enggau Tinggal Kenang,” ku Lesley.

“Kami mega kala ngeluarka single keterubah ba taun 2012 enggau lagu Sulu ke bisi dalam album keterubah kami nya,” terang Lesley.

Iya madah, entara lagu tebilang ti mujur ngangkatka nama Loundness Empire iya nya lagu Sulu (2012), Pengerindu Nadai Penyangkai (2014) enggau Tinggal Kenang (2017).

Gaga endar ati sida sebuat ku Lesley lebuh meda lagu diterima bala peminat lalu peninga suah minta lagu nya ditebah ba stesyen radio menua tu.

“Enda alah ditiu pengaga ati kami sebuat lebuh lagu ditengkebang kami diterima mensia mayuh lalu nyadi lagu tebilang udah nya.

“Loundness Empire nerima bemacham anugerah enggau diberi peluang lalu dipilih nyereta pekit ke bisi diatur ba menua tu.

“Kala nyadi finalist Anugerah Musik Dayak (AMD) 2014 Katetegori Lagu Rock Pemadu Manah (Band), Kategori Lagu Balada Pemadu Manah (Band) enggau Kategori Karung Album Pemadu Manah (Band).

“Kala mega nyadi Finalist Anugerah Carta Sapa Juara (ACSJ) diatur waiFM, nyadaka lagu Pengerindu Nadai Penyangkai (2015) enggau lagu Tinggal Kenang (2017),” lansa Lesley.

DIKELALA… Trofi ti mujur dipenggi Loudness Empire band ba ACSJ 2017.

PENUMBUH BAND

Kebendar, band tu ditumbuh raban nembiak ke belajar ba sebengkah palan pelajar di Kuching; UniRazak tauka tampak agi dikelala enggau nama Sidma Kolej Sarawak.

Lebuh nya ku iya, sida sebakih apin ngepunka pengawa nengkebang lagu tang semina belagu maya bisi program diatur palan pelajar nya.

“Kami suah dikangau merindang lebuh bisi Pengerami Makai Lemai baka mantar Gawai Dayak enggau Krismas sereta Pengerami Staf UniRazak.

“Ari nya, bala bakih ti sama rindu bemain kereban muzik enggau belagu lalu teulihka runding numbuhka sebuah band digelar Loudness Empire.

“Kami bulih penemu meri nama band tu ari siti band Jipun benama Loudness.

“Suba, kami ngaga nama band nya semina rindu ati aja laban siku ari kami sebakih rindu amat ngena baju bisi tulis Loudness.

“Nyau ke lama, kami sebuat setuju milih nama Loudness enggau nama Empire ba ujung, dipegulai nyadi Loudness Empire,” ku Lesley nikalka kenang diri.

LAGU TEBILANG… Lagu Tinggal Kenang udah ngangkatka nama Loudness Empire band kelimpah mujur bepekit ngagai renggat final ACSJ 2017 ba Betong.

DITERIMA PEMINAT

Udah nya, nama bansa Loudness Empire angkat baka penanyi beraban ke bukai lebuh sida mai lagu Pengerindu Nadai Penyangkai.

Bepun ari nya, nama Loundness Empire majak angkat sereta majak dikelala bala peminat.

Nya kebuah, sida sebakih mutus ati ngena nama lagu Pengerindu Nadai Penyangkai nyadi nama album keterubah sida.

Ku Lesley, lebuh numbuhka siti band, udah tentu kitai bisi juluk ba mayuh pekara baka pengangkat enggau pengelaku lagu ditengkebang sida.

“Kami nadai juluk ati bukai kelimpah ngarapka lagu ditengkebang enggau disada kami tu rindu didinga bala peminat enggau diterima.

“Tuju kami deka ngerembai enggau bekunsika muzik kitai Dayak ngagai selampur menua kelebih agi ba genre rock enggau modern rock.

Terang iya, sukung peminat mega beguna amat nentuka pemansang industri muzik Dayak ulih seikas enggau muzik bukai kelimpah ulih dikerembai ngagai menua bukai.

Berindik ari nya, kami ngarapka bala peminat lagu Dayak seruran nyukung asil kereja bala penanyi, penengkebang lagu enggau leka lagu sereta serikat rekoding.

“Aku ngarapka bala peminat terus meri sukung teguh ngagai industri muzik kitai Dayak laban enti ukai kita, sapa agi deka nyukung?,” ku iya.

SERIBU KENANG

Lebuh bekenangka pejalai sekumbang merindang ba menua tu, Lesley madahka sida ngasaika mayuh kenang pait manis diasaika sida.

“Seribu kenang enggau pengingat kala diasai lebuh bejalai merindang kelebih agi lebuh betemu, berandau enggau bekunsika penemu enggau bala artis lama enggau baru.

“Kami mega berasai rindu lebuh bisi merindang begulai enggau bala bakih sereta peminat.

Kelimpah ari nya, iya ngarika sida sebuat meri besai terima kasih ngagai bala peminat ke enda belampung ati nyukung kami kenyau ari band tu baru ditumbuh nyentuk diatu.

“Sukung bala peminat tu ngasuh kami angkat ba industri muzik Dayak lalu sama mega enggau sida ti udah bekerejasama enggau kami ngelama tu.

“Nya alai, sukung mih industri kitai Dayak ngambi ulih seikas sereta nyingkang baka industri muzik menua bukai.

SUKUNG

Ba pengujung randau, Lesley mega bisi ngerintaika pelasar digital ke tau dipeda bala peminat ngambi nemu berita pemadu baru ari Loudness Empire band tu.

Bala peminat ti deka nemu berita pemadu baru ari band kami tau ngelawa Channel Youtube kami GilsonProduction sdn bhd ba link https://www.youtube.com/channel/UC5CwY_XI69MiuYg5iYe01Sg.

Kita mega tau ngelawa dua akaun Facebook kami iya nya Fb page Loudness Empire:

https://www.facebook.com/pages/category/Musician-Band/Loudness-Empire-Band-518785808239595/ enggau Fb Gilson Production Sdn Bhd: https://www.facebook.com/gilsonproduction/

“Terima kasih ke sukung semua kita ngelamatu!” ku Lesley nyimpul randau bekaul berita pemadu baru ari band Loudness Empire.