Lucy M penanyi ti landik nengkebang lagu

Mayuh program merindang dikinsil ketegal pengerekai igi penyakit Covid-19, tang siku penanyi tebilang Lucy Mapang tauka Lucy M, 38 madahka awak nya dikena iya nengkebang lagu baru ungkup artis Iban bukai.

Lebuh dirandau pemberita, Lucy nadai sangu bekunsi cherita lalu iya madah diri anak kedua ari lima iku diri menyadi. Diatu iya diau mendam ba Bintulu, udah nirika rumah tangga sereta Puji Tuhan bisi dua iku anak bela lelaki.

Ngenang penatai asal apai indai, iya madahka niang apai iya endang tulen Iban asal ari Engkilili, Sri Aman lalu indai iya penakan Penan Melanau ari Bintulu.

Lucy madah niang apai midang ba taun 2001 ketegal penusah bebadi ba jalai alun. Nya siti ari pengingat pait ke enda ulih buai iya nya lenyau siku orang ke pemadu disayau.

Ngelansa pengawa lepa kelimpah ari pengawa belagu, Lucy siku orang ti rinduka pengawa nyumai enggau ngaga kuih.

LUCY M

Lucy kala tebilang enggau lagu Buya Bepangan madah, sekumbang Atur Tagang Pejalai (PKP), Atur Tagang Pejalai Bersyarat (PKPB) enggau Atur Tagang Pejalai Penyuman (PKPP) endang diguna belatih dikena ngemanah agi pemanah sada nyawa iya empu kelimpah begulai enggau diri sebilik.

“Diatu aku sigi nadai mindah ari rumah tang nguna awak nya endur nengkebang lagu-lagu baru ungkup artis bukai.
“Ketegal Covid-19 semua program ti udah dilanggur baka rikoding enggau shoting album baru dikinsil magang,” ku iya lebuh dirandau Suara Sarawak, apin lama ke udah.

Tandu Lucy, perambu ngatur konsert udah tu ila endang bisi tang bala pengatur konsert agi bedau bepun maya tu ke alai iya agi nganti peluang bemacham program dibuka baru.

“Enti aku bisi ngulu sekeda program belagu udah tu ila, aku ngarapka bala peminat ti datai nyaga takah enggau pangan diri, anang mai nembiak mit sereta semampai nyaga pemeresi diri.

“Nyema bisi bala ti rengga baka batuk, tabin enggau angat isi anang guai dulu datai begulai enggau bala mayuh.
“Nyema enti maya nya piak pengatur enda ngasuh kitai begambar, aku ngarapka bala peminat ulih nerima, asal meh ati kita tepantup meda aku belagu,” ku iya meri jaku lalau.

MERINDANG…Lucy lebuh dikangau merindang.

Ku Lucy, album baru iya ti diperambu taun siti nyin kemari udah dilanjar ketegal penanggul ti nyadi maya tu.

“Enti nitih, album baru aku pansut bulan June tu tadi tauka sebedau Gawai, tang ketegal pangka Covid-19 semua proses ngaga album nyau tejanggal magang.

“Nya alai, piak pengatur diatu benung ngaduka album artis bukai ti dulu ari aku sebedau nampung proses ngaga album aku ti tejanggal nya.

“Album baru aku dipelaba deka tembu ujung taun tu tauka pun taun baru (2021),” ku iya.

Iya ngarapka pengawa ngatur album baru nya nadai penangggul lalu meruan diterima peminat baka selama.
“Nuju bala peminat disayau aku, enggau peluang tu aku deka madah nama album baru aku nya ila dikumbai Sampai Ke Serega. Bela besampi awakka album nya ulih mujur dikeluar ba taun baru.

Koleksi Album

“Sukung meh industri muzik kitai Dayak sereta beli meh album ti tulin ngambika bisi modal dikena kami ngaga album baru ke bukai,” ku iya.

Lagu Lucy ke balat dikerindu peminat baka lagu Minta Ngatur Pekara Tua, Dendam Enda Padam, Semina Tinggal Pengingat, Sayau Sampai Mati, Merap Bulan enggau ke bukai.

Asil pemanah sada nyawa ti lunak didinga ngujungka iya kala nerima beberapa anugerah baka champion Anugerah Lagu Pemadu Tebilang (AJARR 2011) nengah lagu Dendam Enda Padam.

Udah nya 2012 ba anugerah ke sebaka (AJARR) iya bulih lumur dua kategori Lagu Pemadu Tebilang nengah lagu Buya Bepangan.

Ba 2014 iya nerima Anugerah Vokal Pemadu Manah nengah lagu Kelalu Laun ba Pekit Anugerah Charta Sapa Juara diatur RTM.

Taja pia, sebedau begelar penanyi Lucy bekunsi siti pengingat ke pemadu manis iya nya kala nyadi champion ba Pekit Beauty and Slimming Pageant ke diatur di Kuala Lumpur 2010.

Pesan ari Lucy , iya meri terima kasih ngagai semua peminat ke semampai meri sukung kenyau keterubah masuk dunya pemerindang nyentuk diatu.

“Peminat mih sempama kedap dikena kami beridup, laban enti nadai peminat sapa mih orang ngelala Lucy M baka ke sehari tu,” ku iya.

Berebak enggau nya, iya seraya meransang bala peminat anang leju nyukung iya enggau bala artis ke bukai.
“Sambut mih salam sayau ari aku,” ku iya ngujungka randau enggau pemberita.

Suara Sarawak