Luli Gagat indu Iban keterubah belakun enggau serikat filem entarabansa

KUCHING: Sapa kala nyangka ba taun 1954, Sarawak udah bisi siku pelakun indu Iban ti belakun enggau serikat filem entarabansa dikumbai Shaw Brothers.

Kaban Gerempung Pemansang Filem Nasional Malaysia (Finas) Sarawak Datuk Norhyati Ismail madahka Luli Gagat, 85 taun nyadi indu Iban keterubah kala belakun ba filem ‘The Long House’ di Sarawak enggau Singapura.

“Kami empu baru nemu, lalu kami diatu benung mansik pejalai pengidup iya.

“Nengah ‘Program Finas Prihatin’ kami deka nyidi bala pelakun ti kala belakun kelia,” ku iya.

Norhyati bejaku munyi nya lebuh ditanya pemberita maya ngabas Luli di Jalai Singai Matang ditu, kemari.

PELAKUN LAMA…Norhyati (kanan) benung berandau enggau Luli (kiba) di Jalai Singai Matang ditu, kemari. FOTO RAMIDI SUBARI.

Ku iya, filem ti dipasuk Luli nya siti ari pesaka berega ngagai Sarawak laban mandangka pengidup lama enggau pengidup orang jeman klasik.

“Kami deka ngaga kisah pasal indu tu, nya alai pansik ti meruan mesti digaga dulu.

“Agi mayuh bala pelakun bukai ti kala enggau orang belakun kelia bedau ditemu,” ku iya.

Iya nandu, sejarah pasal Luli deka dibai ngagai indu opis Finas lalu sida merambu deka ngulihka filem lama nya.

“Ngulihka filem lama nya enda muntang tang kami deka ngulihka penerang sentang iya.

“Pansik bisi digaga tang pejalai ngulihka filem lama nya agi digaga berenggat.

“Filem ‘The Long House’ tu siti ari filem antik laban indu dalam cherita nya indu Iban ke beumur 17 taun,” ku iya.

‘The Long House’ sebuah filem entarabansa ti dikeluarka Shaw Brothers ba taun 1954.

Filem tu ngenang pengidup siku lelaki orang putih ti datai ke Sarawak ba sebuah pengerami.

Lelaki orang putih nya labuh pengerindu ngagai siku indu Iban (Luli) tang pengerindu seduai ditagang orang rumah panjai.

Pengujung cherita, lelaki nya mati ditunu ba rumah panjai tang indu Iban nya mujur diselamatka.

ENDA DISADANG…Luli Gagat, pelakon indu Iban keterubah dalam filem The Long House. FOTO RAMIDI SUBARI.

Suara Sarawak