Titih mih orang bukai ke udah jauh mansang ngambi kita sama teulihka pemujur
KUCHING: Makit chabi ngembuan penau ke chukup besai dibanding enggau utai tanam ke bukai.
Modin Ambau, 39 taun madah iya milih chabi laban utai tanam tu dipeda jampat agi mansut ke asil bebanding enggau utai tanam ke bukai.
“Dalam tempoh 75 ngagai 90 hari udah ditanam, chabi sigi udah ngeluarka asil. Penyuah iya mansutka asil ngujungka kitai ulih ngembuah chabi tu manggai tiga ngagai empat hari sekali.
“Tambah mega, chabi enda berat dikereja baka ngereja sawit. Engkeman dikereja sida ke udah lunggar umur,” ku tusui Modin maya dirandau Suara Sarawak bekaul enggau pengawa nanam chabi ke dikemeran iya ba menua asal diri di San Semanju, Lubok Antu.
Nangkan nya, Modin madah iya nanam chabi bansa ke besai. Enti chukup intu chabi tu ulih mansang besai sampai 8 ngagai 10 inci.
“Benih tauka paung meseti dibeli ari pemekal empu. Kebuah pia laban semina benih ke bisi kualiti aja patut ditanam.”
Reti bekebun chara teknologi ke disebut orang ‘fertigasi’, ku Modin ai enggau baja disimpan tauka diberi terus ngagai pun chabi seretai ngena paip.
“Pun chabi mega ukai ditanam ba tanah. Pun chabi ditanam ba ampas buah nyur ke udah diproses. Ampas tu disebut ‘cocopeat’. Cocopeat tu ditepu dalam kambut plastik.
Nitih ke pansik mega, ngena chara baru tauka moden tu, 1000 pun chabi ulih ngeluarka asil manggai dua tan ngagai 2.5 tan sebulan.
Tandu Modin, pun chabi tu patut diberi baja enggau ai nitih ke umur. Baja ke diberi nya disebut baja A enggau baja B.
“Dalam tempoh 75 ngagai 90 hari udah ditanam, chabi sigi udah ngeluarka asil. Penyuah iya mansutka asil ngujungka kitai ulih ngembuah chabi tu manggai tiga ngagai empat hari sekali.”
“Tu mih bansa baja ke dikena orang ba sistem fertigasi. Baja A enggau B tu bisi takat ke dibacha enggau EC meter maya diberi ngagai pun chabi.
“Semua baja disimpan ba deram lalu diberi dua jam sekali. Makin tuai makin mayuh agi baja enggau ai patut diberi,” ku iya.
Berebak enggau nya, pemeresi ba kandang kebun meseti dikemerat ngambika chabi ulih diseliah ari kena sebarang penyakit.
“Chabi tu senang kena penyakit. Nya kebuah kebun aku dipagar enggau manah, meseti seruran beresi. Enti kebun kamah, penyakit mudah amai nyerang pun chabi,” ku iya.
Tandu iya, nginsap sigi enda dikemendar sekali ba kebun chabi tu. Tu dikena nagang penyakit.
“Chabi tu meseti dipancit ngena rachun indu utai enggau rachun kulat selang tiga ngagai empat hari skali.
“Disiplin meseti tinggi maya nyaga tauka ngerachun dikena nagang mayuh macam bansa penyakit chabi,” ku iya.
Bekau ari pemujur naka ke diatu aku ngarap bisi bala bukai tebuka ati pengudah beratika pengawa tu.
“Kitai meseti nerima penemu baru tau ka teknologi baru dikena ngemansang ke diri. Baka nya mega ba pengawa betanam betupi, kitai mega meseti berani nerima utai ke baru.
“Ukai semina nanam chabi tang mega utai tanam ke bukai. Berani keluar ari runding ke semina madah cukup makai.
“Titih mih bansa orang ke udah jauh mansang ngambi kita sama teulihka pemujur,” ku iya.
Modin mega ngarapka perintah ulih meri sukung ba orang bekebun chabi ti ngena cara baru baka tu.
“Arapka bala pengari rayat tauka ejensi betanam betupi ulih chakah agi beratika pengawa baka tu ngambi tau pulaika pemaik semua.
“Bantu sereta sukung patut diberi ngagai kami (pekebun) ke udah tauka orang baru ke deka nguji bekebun chabi ngena chara teknologi fertigasi baka tu,” ku iya.
Pengandal aku ba pengawa tu arapka kitai (Iban) sama ulih besemekih ngemansang diri enggau menua sereta nyingkang mansang sebaka enggau bansa bukai.
Penerang silik pasal bekebun tauka deka ngudar chabi ari Modin ulih betelefon terus nuju lumur telefon 013-8410452.
