Makit produk pemakai terus dikerembai

KUCHING: Perintah Sarawak deka berundingka chara ngerembaika makit produk pemakai ngagai menua besai baka China, Korea enggau Jipun.

Sapit Kepala Menteri ti mega Menteri Betanam Betupi, Tanah Adat enggau Pemansang Kandang Menua Datuk Amar Douglas Uggah Embas madahka sida endang bisi perambu deka ngerembaika produk pemakai ti diguna ba menua nya.

“Kitai endang bisi ati deka ngerembaika makit ngagai menua China, Korea enggau Jipun, engka sida din bisi begunaka sesebengkah produk pemakai ti dikemisi kitai ditu.

“Kami deka meda baka ni kitai ulih ngatur kerejasama laban pemadu beguna, di Korea sida bisi teknologi ti tinggi,” ku iya.

Uggah bejaku munyi nya lebuh ditanya pemberita maya ngabang ngagai rumah Eksekutif Editor New Sarawak Tribune Rajah Murugiah ditu, kemari.

Tandu Uggah, lebuh datai ba taun 2020 teknologi pemadu baru dikena baka internet enggau drone dalam nentuka kualiti enggau kuantiti produk ti diasilka.

“Lebuh nentuka kualiti enggau kuantiti ti nyapai tikas pasar luar kitai begunaka teknologi tinggi baka drone.

“Kitai mega meseti kompetatif ba sukut rega sereta nitihka standard pemakai menua luar nya ngambi ulih meri bekal pemakai ti enda nemu putus,” ku iya.

Ngelansa pekara bukai, Uggah madahka Sarawak udah bisi orang dagang ti rembus ngagai pasar luar di China enggau Hong Kong ba produk ikan empurau.

“Empurau tu ikan ti ngembuan kelas ti tinggi lalu udah bisi orang dagang menua tu ti udah mujur nyual empurau ngagai China enggau Hong Kong.

“Tu muka ruang nambahka peluang nyungka ekonomi menua dikena nyapai juluk ati Kepala Menteri Datuk Patinggi Abang Johari Tun Openg iya nya Sarawak nyadi pengeksport besai produk pemakai,” ku iya.