SERIAN: Kaul kerejasama entara Malaysia enggau Indonesia ulih nyukung bemacham insiatif kelebih agi ba sektor dagang temuai.

ADUN Tebedu, Dr Simon Sinang Bada madah, program main asal entara kededua menua nya ulih ngangkat penuh sektor dagang temuai.

“Pia mega, program tu deka mandangka institusyen pekara seni enggau main asal Sarawak kelebih agi ba Bagi Menua Serian enggau Pelilih Tebedu,” ku iya.

Dr Simon mansutka jaku nya ba sebengkah penerang Unit Komunikasyen Perintah Sarawak (UKAS) rambau Program Malam Titian Muhibbah Ke-15 2023 ditu, empai lama.

Iya madah, pengawa ngatur program nya asil ari insiatif Opis Pelilih Tebedu enggau Kechamatan Entikong.

“Kerejasama manah kededua ejensi tu dikena mandangka pemanah enggau pengaya main asal lokal nengah aktiviti seni enggau lumba,” ku iya.

Iya mega ngelalau semua tuai komuniti, tuai opis sereta ejensi Perintah Besai enggau Perintah Nengeri, gerempung ukai dikuasa perintah (NGO) sereta semua serak komuniti ba Bagi Menua Serian terus negap sereta ngetan seni, main asal enggau pesaka bansa ti dikembuan kitai.