KOTA SAMARAHAN: Manggai tiga juta hektar tanah Adat Bansa Asal (NCR) di Sarawak mujur disukat ke alai manggai sejuta hektar ari nya udah digazet nengah bejalaika Inisiatif Baru NCR kenyau ari taun 2010 nyentuk Oktober 2026.

Sapit Premier Sarawak, Datuk Amar Awang Tengah Ali Hasan madahka pemujur nya mandangka pengeran Perintah Sarawak ngerumban pengawa nyukat tanah dikena nyamin hak rayat Bumiputera.

Ku iya, pengawa bejalaika inisiatif nya ngaul sekeda atur beguna nyengkaum peminta, pansik ari Opis Tanah enggau Survei (JTS), randau begulai enggau peranak sereta pengawa nyukat.

“Program tu nitih ke peminta enggau pekara diperunding kitai. JTS ngaga pansik sebedau dikemendar

. “Sebedau pengawa nyukat dipejalai, kitai berandau enggau sida ti bekaul dulu,” ku iya.

Awang Tengah nyebut jaku nya nya pengudah Pengawa Nyuaka Gazet Rizab Komunal Bumiputera, Surat Pala Tanah sereta Chek Pampas Tanah Bagi Menua Samarahan di Balai Suarah Kota Samarahan, ditu kemari.

Iya ti nyadi Menteri Pengeraja Asal enggau Pemansang Mengeri nerang, pengawa nyukat tanah NCR dipejalai nengah dua renggat iya nya nyukat kelingi tanah nengah Seksyen 6 Kanun Tanah Sarawak (KTS), dientudi pengawa nyukat lot individu nengah Seksyen 18 kanun sama.

Ku iya, kerejasama peranak dikena ngelala enggau ngenuku sitak tanah beguna amat nentuka pengawa nyukat lanchar sebedau surat pala tanah individu dikeluar.

“Surat pala tanah nengah Seksyen 18 Kanun Tanah Sarawak bisi penyelai kediri empu, baka timpuh hak ngempu belama iya, enda ibuh bayar pupu premium enggau pupu tanah, seraya ungkus nyukat dipelanja perintah,” ku iya.

Dikena ngerumban pengawa nyukat tanah NCR, Perintah Sarawak udah ngemendar agih belanja RM40 juta dikena ngemujur program nya, dibanding RM2 juta ti diterima ari Perintah Besai taun tu. Pia mega, perintah nengeri ngemendar pengawa ngambi urung 467 staf dikena ngemujur tim nyukat JTS ngaul agih belanja urung RM30 juta setaun.

Ku iya baru, peminta nyukat lot individu nambah nunjukka pejalai projek nya mujur lebuh majak mayuh sitak udah disukat kelingi.

Ngenang dawa nyebut perintah enda berati ke isu tanah NCR, iya nyemetak madahka Perintah Sarawak semampai ngaku hak adat Bumiputera ti bisi bukti nitih atur undang-undang.

Ambi ke banding, ku iya, semina urung 260,000 hektar tanah mujur disukat sepanjai timpuh lebih 50 taun, iya nya ari 1960-an nyentuk 2010, sebeda Inisiatif Baru NCR dipejalai.

“Ari taun 1960-an nyentuk 2010, kitai semina mujur nyukat endur pemesai urung 260,000 hektar aja. Nya kebuah, kitai berunding baka ni chara ngerumban pengawa nyukat tanah tu dikena nentuka hak sida dijamin,” terang iya.

Ba pekara sama, Awang Tengah nerangka ubah KTS nengah Seksyen 6A mega nyendiaka mekanisme nentuka peminta bekaul tanah wilayah adat Bumiputera tauka Native Territorial Domain diperunding, nyengkaum pekara ti dibantai bekaul Pulau Galau. Ku iya, tetiap peminta meseti nitih ke penteba ti ditetapka lalu nengah perati JTS sebedau diperunding meri hak ngempu tanah komunal.

Nangkan nya, iya ngelalau penerima surat pala tanah ngambi ngemansang tanah sida chara manah lalu anang berumban nyual ketegal deka untung jampat. “Aku ngelalau sida ngena tanah tu enggau manah.

Anang nyual tanah ketegal deka untung jampat tang kemansang tanah laban tu ulih meri pemaik,” ku iya. Iya mega meri terima kasih ngagai mensia mayuh ke kerejasama ngemujur program nyukat tanah NCR dikena nyaga hak ngempu tanah sereta nyamin pengelantang rebak dudi. – EDISI UKAS