KUCHING: Manifesto Gempung Parti Sarawak (GPS) ungkup rayat ba sitak Kunsil Nengeri (DUN) Jepak ukai semina semaya aja tang patut nyata dikereja.
Siku Tuai Raban Bansa Kampung Sebiew, KK Saiful Bahri Bujang, 62, madahka pengari GPS ti bediri minta pilih ba DUN nya udah besemaya lebuh mantaika manifesto kena Hari Minggu tu tadi.
“Sida (GPS) udah besemaya, aku andalka manifesto nya nyadi nyata.
“Aku andalka utai ti nyata, ti patut nyadi realiti ba Jepak dudi hari, semua tu endang ungkup rayat,” ku iya lebuh ditanya Suara Sarawak tadi.
KK Saiful madah, manifesto nya patut nyadi utai ti nyengenda nadai ngira tumu tauka laun.
“Ba Jepak ditu, rayat agi tubah begunaka bantu rumah baka ‘Rumah Mesra Rakyat’, nya siti pekara ti dikeandalka kami ba ditu.
“Enti ba sukut infrastruktur, aku ngasaika semua udah chukup, bekal kuasa karan, bekal ai beresi enggau jalai alun semua udah bisi, semina nalan berumah agi kurang.
“Kami andal amat bisi skim pengawa berumah baka di Kidurong digaga ba Jepak,” ku iya.
KK Saiful mega andalka rayat ba Bintulu diberi peluang pengawa puang laban mayuh bala graduet ari menua nya ulih diambi gawa.
“Enti ulih beri meh peluang gawa ngagai orang menua tu empu dulu, laban kami ditu mayuh graduet ti pandai sereta ulih gawa,” ku iya.
