SYLVESTER RIANG
Suarasarawak.news@gmail.com

KUCHING: Bulih 5A, 4B ba peresa Sijil Pelajaran Malaysia (SPM) 2024 siti tepa pemadu berega ba siku nembiak Sekula Sekondari (SMK) Lubok Antu ungkup indai dikesayau.

Nembiak nyulut nya, Marilyn Menai Karin madah, iya chukup gaga, temegah enggau gagit lebuh ngambi pemutus peresa nya tadi.

“Aku ngadang diri bulih pemutus baka tu bepelasarka tikas pengulih aku ba mayuh peresa sebedau tu.

“Tu siti berita gaga ba aku sereta nyadi tepa pemadu berega ungkup indai dikesayau.

“Semua pengelelak enggau pengiruh aku belajar ngelama tu udah tebayar nengah pemutus nyulut tu,” ku iya.

Marilyn madah, enti deka bulih pemutus nyulut, kitai meseti regas nanya bala pengajar enggau bakih nyema enda mereti ke topik ti dipelajar.

Kitai mega, ku iya, enda tau enda ngaga not pandak kediri empu ngambi muntang agi kitai mereti ke siti-siti topik kelimpah belajar kediri empu ba rumah.

Tampung iya, tentu ke selinting kitai ba tetiap peresa ti diambi lalu bebendar agi belajar dikena nyapai selinting nya.

“Aku rindu ke kus bekaul pengawa berubat, injiniring enggau injiniring komputer lalu aku deka nampung pelajar ngambi kus tu,” ku iya.