PELAKUN tebilang Brunei Darussalam, Marina Brooke ngindangka sayap diri ba dunya pemerindang Iban.

Aku Tetap Menantimu enggau Suamiku Mr Perfect entara drama televisyen (TV) Brunei ti kala dilakunka iya.

Tang sayau, drama nya semina dipandang ba TV ba menua nya empu aja.

Kena 23 September tu tadi, iya ti tampak agi dikelala ngena nama Marina Jara mujur ngeluarka lagu baru ti pejuluk Chelum Manis Buah Manggis.

Pemanah enggau penyelai petah nyawa iya nyadaka lagu ti ditengkebang Dedi Mariket nya sereta kualiti video muzik (MV) mujur narit ati mensia mayuh.

Nya ti ngujung ke lagu nya dipeda ba penyuah urung 170,000 kali sereta nerima kelai like lebih 2,000 ari mensia mayuh.

Ukai naka nya aja, lagu nya nyadi top (ba rintai pemadu atas) suah diputarka ba churung radio kelimpah viral ba sebelah media sosial.

NYELAI ARI LAGU BUKAI

Marina ti gawa ba Singapore Airlines nya madah, lagu nya ngembuan penyelai kediri empu sereta bebida ari lagu bukai.

Enti ngelama tu, ku iya, tebal agi kitai suah mendingka lagu ti muji lelaki sigat, betubuh gap sereta bekulit burak lis.

“Enti semina lelaki sigat bekulit burak aja dipuji baka ni pengasai ati sida lelaki ti bekulit chelum manis deh?

“Nya alai, lagu Chelum Manis Buah Manggis tu dituju khas ngagai raban lelaki ti bekulit chelum manis ngambi sida enda berasai dikelaung.

“Udah tentu tu meh penyelai lagu tu ari lagu bukai. Kebendar, semua lelaki bela sigat enda ngira sida bekulit burak lis tauka chelum manis,” terang iya.

Nangkan nya, iya madah, nya semina lagu aja lalu nadai besangkut paut enggau pengidup iya.

Kelimpah ari nya, ku Marina, semua rentak lagu iya nitih ke tiun muzik lagu Dayak Kalimantan.

Tuju iya ngaga baka nya ngambi lagu iya bisi dipeda bebida sereta nyelai agi ari lagu bukai.

“Genap kali lagu nya diputarka orang, sida deka ngelala nya lagu aku laban rentak lagu nya baka tiun muzik Dayak Kalimantan,” tampung iya.

NGUJI PEKARA BARU

Penanyi enggau pelakun bajik nya berengkah ngaul dunya pemerindang Iban ba taun nyin kemari nengah lagu Gawai ti pejuluk Selamat Gawai Wai Temuai.

Leka lagu nya ditengkebang iya empu lalu muzik diatur Jon Delonge (Indonesia) sereta dikeluarka komposer tebangkar nama, Embat Lala ba pelasar YouTube Panggau Buluh Pengerindu (PBP).

Keterubah suba, ku Marina, iya nadai niat deka ngeluarka lagu nya laban semina ungkup akaun YouTube iya empu aja.

Berekat peransang laki dikesayau, iya pen setuju ngemendarka Embat Lala mansutka lagu Gawai nya.

Entara lagu mujur dikeluarka indu penakan Dusun Brunei, Iban enggau Dayak Indonesia nya baka Selamat Gawai Wai Temuai (2022), Nuan Pengandal Atiku (2023), Jerangau Mirah (2023) sereta Chelum Manis Buah Manggis (2023).

Ungkup penerang, darah Dusun Brunei, Iban enggau Dayak Indonesia nya muak ke indai lalu apai endang Iban tulin.

UDAH SELATAN

Peranak asal ari menua ti kaya enggau asil minyak nya endang ngembuan minat ba pengawa belagu enggau belakun.

Iya minat ba pengawa belagu nya pengudah masuk Raban Koir ba Gerija St Andrew Brunei lalu majak beapi-api nyentuk diatu.

Ba taun 2012 suba, Marina betemu enggau laki iya ti mega siku pemain gita ngagai penanyi Iban tebangkar nama, Ricky El.

Pengudah nya, iya suah nyempulang sida laki iya merindang ba bemacham program enggau pengerami sereta diberi peluang merindang.

Ukai naka nya aja, Marina bepeluang meda Ricky El ngerikod lagu tauka shooting MV.

“Ari nya meh aku berengkah bisi minat ngagai lagu Iban nyentuk diatu,” ku iya.

Maya agi mit suba (Primari Tiga), iya kala masuk pekit lagu sembiang sereta bulih penuduk ketiga.

Minat Marina belagu nya nyangka diparit peturun muak ke apai iya ti bela minat ba pengawa belagu.

RANSING BELAJAR

Lebuh nusui penguji diri sekumbang mekuh dunya pemerindang, anak ketiga ari empat menyadi nya madahka diri enda tentu landik bejaku Iban.

Iya madah, udah tentu penanggul nya nyadi penguji besai ditapi iya kelimpah ari siku orang ti chukup pemalu.

Nya alai, lebuh iya dikangau merindang sebelah Miri, iya enda tentu berani bejaku Iban laban nangika diri salah sebut.

Nyau kelama udah nya, berekat ari pengeransing sereta pengepuh iya belajar ari laki enggau bala bakih, jaku Iban iya pen majak lanchar.

Kelimpah ari nya, iya suah datai meri sukung ngagai sebarang artis Iban ti merindang ba pelilih Miri.

Ari nya mega iya belajarka jaku Iban sereta leka jaku ti nemban disebut lebuh bediri ba atas panggau pemerindang.

NYINGKANG KE MUA

Lebuh dirandau bekaul perambu dudi hari, Marina madahka diri deka terus mansang ke mua ba pengawa belagu enggau belakun.

Iya mega ngarapka lagu diri majak dikerindu semua orang enda ngira penempa, umur, jaku, chura kulit enggau jalai pengarap.

Marina temegah industri muzik Iban kemaya hari mansang nuju penyulut besai, suah trending ba YouTube sereta bekualiti ari sukut leka, tiun enggau MV lagu.

Diatu, ku iya, industri muzik Iban udah nempa mayuh penanyi bepenau ti datai ari pupu bansa lalu ukai semina Iban aja.

“Tu siti pengerembai ti manah ngelai industri muzik Iban majak dikelala enggau diaku semua orang sereta nyadi pengempung pupu bansa,” terang iya.

Marina beterima kasih ngagai semua orang kelebih agi bala peminat, laki dikesayau, sida sebilik, bakih enggau kaban belayan.

“Terima kasih ke sukung, peransang enggau sampi semua kita. Anang leju nyukung aku sereta bala artis ti bukai lalu begempung meh kitai nyagu industri muzik Iban tu terus nuju penyulut besai dudi hari.

“Peransang ari kita ngasuh aku majak ransing agi deka ngeluarka mayuh agi lagu dudi hari.

“Enti ngelama tu aku bisi ilap, salah jaku sereta pengurang enggau penimpang, aku naka ulih ngemanahka diri empu,” ku Marina seraya nusun jari sepuluh kelai minta ampun.

Tampung iya, enti kita bisi penau belagu, anang malu mantaika penau diri lalu begulai meh ngerichah industri muzik kitai.