KUCHING: Pengawa muai uras enggau chara belalai, muai teda toksik enggau pengawa muai uras industri ti enda likun nyadi penyalah berat ti ngeruga pengerai mensia mayuh, rampa menua enggau sungai besai nengeri tu.

Kaban Kunsil Nengeri (ADUN) Pelagus, Wilson Nyabong Ijang madah, atur terit beguna kelebih agi ba kandang menua ulu sungai baka Batang Rajang di Kapit, Baleh, Baram enggau Belaga, ke alai pengawa baka nya tau ngamah ke rampa menua.

“Rang undang-undang nya ngundan siti ari langkar neritka atur ti pemadu komprehensif ti kala ditumbuh.

“Kuasa tu beguna amat dikena nentuka genap orang ti ngereja penyalah ulih diukum sereta ditagang ari nandu pengawa ti tau ngeruga pengerai rayat enggau ekosistem,” ku iya.

Wilson bejaku munyi nya lebuh bejuraika Rang Undang-Undang (RUU) Ngintu Pengeraja Meruan enggau Teda 2025 ba Aum Kunsil Nengeri (DUN) Sarawak Ke-19 ditu, kemari. Ku iya, RUU nya ukai semina mantaika ukum ngagai orang ti salah, tang mega meri ukum nagang penyalah ti tau ngeruga rampa menua.

“Tu nyengkaum penyalah kompaun, ukum mata duit ti tinggi ngagai orang ti ngulang penyalah enggau tanggungpengawa korporat bala kompeni ti ngelanggar undang-undang.

“Undang-undang ti ‘sidi’ manah dikena nyaga Sarawak laban langkar penerit atur nya ukai semina ungkup tuju ngatur, tang mega nentuka pengelikun rayat enggau pengelantang rampa menua ba tikas pemadu tinggi,” ku iya.

Wilson madah, RUU tu ngembuan chara ti progresif laban ngemendarka produk ti bepelasarka teda dikena ngaga kuasa karan, ngeluarka kuasa tauka ungkup tuju bukai ti dikemendarka Perintah Sarawak.

Ku iya, pengawa ngerembaika potensial uras ngagai kuasa enggau pengeraja asal baru nyadi sebagi ari visyen timpuh panjai nengeri tu ngemansangka industri ‘kitar semula gadung’. Iya mega madah, pengawa tu mega dikearap ulih nempa peluang kereja sereta matak pemeranak puku ngena teknologi tinggi.