AGI ngenang pasal dara bajik, Mazzaellynn Brasenia Umang, ba kenang sekali tu kitai deka ngelansa senentang pejalai nampung pelajar ari sekula primari nyentuk bulih Master’s Degree lalu diatu benung nampung pelajar tikas PhD.

Nya kebuah, kisah pengidup Mazzaellynn enggau pengekih nambah penemu diri nyentuk tikas tinggi udah meri peransang ngagai orang bukai kelebih agi rebak biak.

“Pengudah graduet Master’s Degree empai lama, diatu aku benung gawa ba siti kompeni nyadi Environmental Executive sambil nampung pelajar PhD chara full time mode.

“Enti ditanya nama kus PhD, aku ngambi kus Environmental Conservation enggau Research Title Citizen Science and Ecological Monitoring of Sus Barbatus: Assessing Distribution, Habitat Suitability and Disease Impact of Post – African Swine Fever (ASF),” terang iya silik.

Tambah mega, Mazzaellynn madah ke diri keran nyadi siku Academician tauka pemansik nitihka kus diambi iya nya biodiversity environmental conservation.

Nya alai, Mazzaellynn ngarapka pemujur enggau kisah pengidup iya ulih nyadi chunto enggau teladan ngagai rebak biak kelebih agi bansa kitai Iban ngambi ulih nitihka singkang bansa maju ke bukai.

“Keterubah, aku meri terima kasih ngagai tulang belakang aku iya nya apai indai, aki, menyadi, kaban belayan, bala bakih sereta bala pengelicha ti seruran ngembing ngelama tu.

“Jasa sida ari sukut pengelelak, duit ringgit sereta sampi udah ngasuh aku majak kering baka diatu.

“Terima kasih laban maya aku ba penuduk baruh, sida bisi ngangkatka aku, meri sadang penemu, ni ke manah, lalu meri tunjuk ajar maya aku kusut berunding ngadu utai.

“Chukup beterima kasih laban sida bisi ba tisi aku maya tusah enggau senang,” ku iya tuchum gaga.

Sebedau ngujung ke randau, Mazzaellynn mai semua bansa Iban kelebih agi rebak biak besemekih lalu nampung pelajar ngagai tikas tinggi laban penemu tau ngubah runding enggau pengidup kitai.

Iya madah, penemu tau ngasuh kitai majak angkat sebaka enggau bansa bukai.

Mazzaellynn mega minta semua kitai berundingka leka jaku, enti orang bukai ulih enda patut nuan enda ulih?

“Munyi ku aki aku, penemu tu endang enda ngasuh kitai kaya reta tengkira tang ulih nempa kitai nyadi mensia ti beguna sereta nyadi bekal sepanjai kitai idup ba dunya.

“Taja kitai dipeda tinggi ari orang bukai, anang mega kitai ninggi ke diri.

“Enti bisi niat deka nampung pelajar, anang kakang ati tang terus paju ke singkang nuan.

“Enti nuan puntan runding baka ni pejalai ke deka nuan, berandau enggau apai indai tauka kaban belayan besemak ngambi minta sadang penemu ari sida.

“Ingat ke tuju asal kitai maya datai ba universiti, anang alah laban penguji ti deka meda kitai mantul ati,” ku Mazzaellynn meri jaku peransang.

Kelimpah ari nya, Mazzaellynn mega madah, enti bisi tanya pasal pejalai nampung pelajar, kita tau nguji iya nengah Facebook Mazzaellynn Brasenia.

“Dia bisi utai ditanya, tau berandau enggau aku nengah Facebook nya lalu aku naka ulih meri kengka penemu dikembuan diri,” ku iya nutup randau.