KUCHING: Sepenyampau tujuh bangku berubat enggau 10 bangku nganti beungkus RM12,000 disua ngagai Unit Emijensi Sepital Besai Sarawak (SGH) dikena nambah pengelantang pesakit enggau sida sebilik ti nganti berubat dia.
Datuk Bandar Kuching Selatan, Datuk Wee Hong Seng madah, peminta ari raban sepital bekaul guna fasiliti nya di SGH mujur dikeamat berindik ari penyiru komuniti enggau timbal lengkas ari bala pemeri bantu.
“Kadang pekara ti dipeda enda tentu beguna baka bangku ti kebendar meri ubah besai.
“Bantu tu siti ari inisiatif tanggungpengawa sosial korporat (CSR) Majlis Bandaraya Kuching Selatan (MBKS),” ku iya.
Wee bejaku munyi nya lebuh program nyua bantu bangku nya di SGH ditu, kemari.
Iya madah, bantu nya tepa ti besai reti serimbai pengerami Hari Krismas.
“Bantu tu mujur dikeamat asil kerejasama sekeda serikat peribit ti bela nyukung inisiatif nyaga pengelantang komuniti nengah bejalaika program CSR.
“Entara serikat ti bela meri bantu nya baka Katimas Sdn. Bhd., Acute Project Sdn. Bhd., Sharing Planet Sdn. Bhd., Megastanda Sdn. Bhd. Ori Pasti Ori (Kuching) Sdn. Bhd., Alfresco (Kuching) Sdn. Bhd., HS Credit Corporation Sdn. Bhd. sereta Wan Li Wan Welding Works,” terang iya. Iya nyemetak madah, agi tubah sukut di sepital besai nya patut dikemanah, ukai semina ari sukut fasiliti pesakit tang bala lutur, indu misi enggau pesakit sebilik.
Nangkan nya, Direktor SGH, Dr. Ngian Hie Ung meri terima kasih ngagai MBKS enggau bala ti meri bantu nya.
Iya madah, SGH siti sepital ungkup semua sereta agi begunaka sukung meruan ari mayuh raban dikena ngemanah agi gaya berubat enggau fasiliti teknologi.
“Taja pen bisi agih belanja ninting taun ari Perintah Besai tang guna ti amat sepital tu chukup besai.
“Bantu mit ari komuniti ulih meri empas besai ngagai pengelantang pesakit,” ku iya.
