KUCHING: Majlis Bandaraya Kuching Selatan (MBKS) ngelanchar ‘Bank Uras’ dikena meransang komuniti nyaga pemeresi enggau pemeruan rampa menua nengah pengawa ngena baru uras.
Datuk Bandar MBKS, Datuk Wee Hong Seng madah, buah runding ungkup inisiatif nya datai ari Sitak Pengerembai ASEAN Timur – Brunei Darussalam-Indonesia-Malaysia-Filipina (BIMP-EAGA).
“Juluk kitai nyendia servis ngatur uras dalam komuniti nengah pelasar ti siruka rampa menua enggau bisi tanggungpengawa.
“Besai pengandal ati kitai ngambi pengawa ngatur uras ulih ditarak nengah pelajar, pengawa nengap sosial, kerejasama enggau teknologi,” ku iya.
Wee mansutka jaku nya rambau Karnival Komuniti Kampung Kenyalang 2023 ba Balai Gerempung Komuniti Kenyalang Park ditu, kemari.
Nya alai, terang iya, inisiatif nya ulih meransang komuniti mutar penanggul ngatur uras dalam menua ti enda sistematik kelebih agi ari rumah.
Iya madahka juluk diri deka bekerejasama enggau palan bebeli barang, supermakit, sitak genturung pendiau sereta sekeda pengeluar bekaul pengawa ngatur uras ba ‘Bank Uras’.
Wee madah, MBKS udah bejalaika program rampa menua ti bukai baka Kimpin Enda Ngagai Polisterin enggau Kimpin Enda Ngagai Straw Plastik ba selampur pasar enggau palan bedaja.
“Kitai chakah nempa MBKS nyadi mengeri ukai semina ngembuan mayuh pemakai asal tang ngemeratka pemeruan rampa menua.
“Pekara tu seraris pengawa ngaku mengeri tu ba renggat antarabansa nyadi mengeri gerai, mengeri dagang temuai, Mengeri Kreatif UNESCO Gastronomi sereta Mengeri Kraf Dunya,” terang iya.
