KUCHING: Opis Menteri Kereja Raya (KKR) andalka raban media seruran nyadi bakih ti meruan ungkup timpuh panjai.
Menteri Kereja Raya Baru Bian madahka tanggungpengawa pemberita dalam mantaika berita pasal pemansang nuju pengelikun enggau pengelantang rayat patut dikemerat.
“Aku andalka raban pemberita terus ngerembaika berita ti betul sereta nyemetak ngagai mensia mayuh.
“Nya alai, pengerami malam anugerah media diatur ngambika meri basa sereta sukung ngagai raban media di menua tu,” ku iya.
Baru bejaku munyi nya ba Malam Basa KKR Ngagai Media enggau Anugerah Media Pembinaan CIDB 2019 di sebuah hotel tebilang ditu, malam tadi.
Iya mega ngarapka raban pemberita anang lembau nulis artikel pasal pemansang infrastruktur ti dipejalai ba menua tu.
“Kitai deka meri perais ngagai raban pemberita ti nulis artikel manah pasal KKR.
“Baka malam tu kitai bisi tiga kategori ti dipekit ngagai kita media ke alai kami ngenang jasa manah kita ngagai KKR,” ku iya.
