TUAH manuk dipeda ba kaki, tuah mensia nadai siku nemu.

Baka nya ku sempama ti nemban dikena nerang pasal pejalai siku pengajar Tadika, Melissa Veronica Thomas di dunya pemerindang Dayak.

Nengah lagu single keterubah iya ti pejuluk Tinggal Ke Ensera, iya ti ngena nama panggau Melissa Thomas mujur ngentapka penuduk diri dalam industri muzik lokal.

Semua nya bepun ari Pekit Belagu Kaban Music Production (KMP) Musin Ketujuh lalu iya siku ari bala pemenang pekit nya.

Penyereta ti ngempu gelar champion nyentuk penuduk ketiga ba pekit nya ukai semina mai pulai perais mata duit aja tang diberi peluang ngerikod enggau ngeluarka siti lagu single ti dipelanja serikat nya empu.

BALAT MANGKA
Lagu Tinggal Ke Ensera ti mujur dikeluarka ba ujung taun nyin kemari mai reti ti besai ba pengidup artis asal Negeri Sembilan nya.

Kebuah pia laban jalai cherita dalam lagu nya endang diangkat ari kisah idup artis nya empu ti kala jelungan pengerindu ketegal orang ketiga.

Ku Melissa, umur maya nya suba agi biak bendar, baru ngangkatka diri bujang dara lalu pengerindu maya nya pen semina ‘cinta monyet’ aja.

Udah nya, iya madah, kisah nya lalu diangkatka iya nyadi jalai cherita dalam video muzik (MV) lagu Tinggal Ke Ensera.

“Perambu asal, lagu tu berentak balada tang laban cherita dalam lagu tu ngenang siku dara nguji move on ari peneleba pait ti kala diasaika iya.

“Nya alai, kami sebuat lalu bebali runding ngaga rentak ranchak ungkup lagu tu dikena meri semangat baru nerus pengidup.

“Udah nya, pengatur muzik, Aya Jumpbull Morcdoc lalu ngenamaka elemen remix dalam lagu tu lalu nya ngasuh lagu tu nyelai agi,” terang Melissa.

LALAU BEGUNA
Seagi-agi kitai idup di dunya injau tu, kitai sigi enda kala lari ari penguji enggau penanggul ukai semina ba pekara besulu tang tu mungkur semua sukut pengidup kitai.

“Aku sigi enda pechaya enti bisi orang ngaku diri semampai tegap belama napi bemacham penguji enggau penanggul ti datai silih beganti.

“Enda belama kitai kering napi semua nya lalu bisi ga maya kitai ngasaika diri balat labuh ba darung pengidup ti dalam.

“Lebuh kitai napi situasyen baka tu, dia kitai deka ngasaika diri nadai guna, jai nasip, enda diaku enggau balat sinu ngenang nasip diri ti bangat jai.

“Taja pia, ingat mih kitai agi bisi orang dikesayau baka apai indai, bala menyadi sereta diri sebilik lalu sida mih orang ti pemadu semak enggau kitai.

“Sida mih ti semampai bisi di tisi lebuh kitai tusah senang, dudi orang bukai datai mantu, sigi diri sebilik mih orang ti keterubah datai mantu kitai.

“Nya alai, anang sesekali kitai pandak runding enggau pandak singkang lebuh ngaga pemutus. Lebuh kitai labuh, keingat mih diri sebilik enggai ke kitai nesal dudi hari.

“Tinggal Ke Ensera tu mai kitai ngerebakka lambar baru ba pengidup kitai, badu ngenang pekara pait ti udah nyadi tang pun ke pengidup baru ti lantang agi.

“Pia mega, lebuh bepangan, anang semina meda pemajik enggau penyigat aja tang peda mega pengelurus ati enggau pemanah budi basa iya ti deka dibai kitai lantang enggau merinsa,” ku lalau iya.

SULU KU SIGAT
Ungkup penerang, pengudah ngeluarka lagu Tinggal Ke Ensera, anak kelima ari enam diri menyadi nya deka ngeluarka lagu baru iya, Sulu Ku Sigat.

“Puji Tuhan laban lagu tu pas ditisih Radio Televisyen Malaysia (RTM) lalu udah diputar ba churung radio.

“Leka lagu tu ditengkebang aku empu nengah kerejasama Pengajar Jonez Mackean enggau Aya Cami Tan ti nyadi pengatur muzik.

“Aku bulih buah runding nengkebang leka lagu tu lebuh aku keterubah ngelala tawing idup aku ke diatu lalu tu siti chara dikena aku ngaku iya ti besai reti ba pengidup aku,” ku terang iya sambil tuchum lelegup.

Ti bendar lagu nya udah lama ditengkebang iya, ku iya, tang baru diatu iya bepeluang ngeluarka lagu nya.

“Enti kita deka nemu sapa lelaki ti betuah nya, peda mih video muzik Sulu Ku Sigat ti deka dikeluarka ba bulan Januari taun baru,” ku iya nyemetak.

PEJALAI MERINDANG
Pejalai Melissa ba pengawa merindang tu berengkah ari pun taun tu tadi iya nya ba bulan Februari pengudah sida sebilik pulai ke Sarawak lalu sebedau tu sida ngentap pendiau diri di Negeri Sembilan.

Berengkah ari nya, iya suah dikangau merindang kin kia di selampur Kuching lalu nya siti peluang besai dikena iya ngerembai penau diri.

Lebuh nampung pelajar tikas diploma di MSU College di Kuching, iya suah diberi peluang merindang ba mayuh program nyengkaum masuk teater muzikal ti diatur kolej nya.

Keterubah suba, Melissa enda pechaya ke iya empu tau tepejuh ba dunya pemerindang laban iya siku orang ti malu enggau takut pansut ari zon nyamai.

Tang berekat ari sukung enggau peransang sida sebilik, iya ulih mujur nerus pejalai diri ba pengawa nya.

Dulu ari nya, iya endang chakah ngaul diri ba pengawa belagu lalu kenyau ari Pom Satu di Sekula Sekondari (SMK) Mantin, Negeri Sembilan sereta masuk Kelab Orkestra.

Genap kali kelab nya ngatur pekit belagu, iya sigi enggau orang ngeruh ai masuk pekit nya lalu lebuh nampung pelajar tikas diploma, iya masuk pekit belagu online, Anak Seni Creation ba taun 2021.

Ba taun kepenudi iya ngambi diploma nya (maya praktikal), iya masuk pekit belagu ti diatur KMP Sdn Bhd ba taun 2022 lalu bulih penuduk kedua.

Ti bendar, Melissa ngembuan minat ba bidang muzik kenyau iya beumur 10 taun iya nya minat nebah perengka muzik baka rikoder.

Berengkah ari nya nyentuk beumur 12 taun, iya suah champion ba pekit rikoder ari renggat pelilih enggau nengeri.

Udah nya, lebuh beumur 13 taun, nya baru iya ngalih ngagai pengawa belagu lalu penau iya ba pengawa nya diansah Pengajar Penyanding Penemu Kelab Orkestra, Koo Tsui Min.

Kelimpah ari Pengajar Koo, ku iya, pengajar muzik sida di Sekula Primari (SK) Mantin, niang Abdul Hadi Ibrahim mayuh mantu iya ba pengawa nya.

Nampung nya, Melissa madah, sida semenyadi endang bekunsi minat sebaka ba pengawa belagu sereta suah karaoke.

“Sida mega suah belagu ngena live band sereta minat lagu rock enggau dangdut lalu aku suah nyempulang sida,” ku iya.

ANDAU PENGUJI
Terang Melissa, laban ti agi baru ba dunya pemerindang Dayak tu, bala pengatur program enda berani ngangauka iya merindang.

“Aku agi baru bendar ba dunya pemerindang tu lalu lebuh kami duai menyadi ambu aku, Boni tauka Boniface Lembang Nyawai nanya bala pengatur program minta slot merindang, sida enggai meri peluang ngagai aku.

“Ku sida madah, ‘Artis tu agi baru, nangika nadai orang meda tentu mayuh penuduk puang iya’ baka ku saut sida lebuh kami duai minta slot merindang ba sida.

“Udah tentu aku berasai sinu laban enda diaku enggau diberi peluang merindang tang aku enda mantul ngapa.

“Lebuh aku masuk pekit belagu ti diatur KMP Sdn Bhd suba pen, aku nyau deka matak diri ba renggat setengan kepenudi ketegal penanggul pengerai.

“Puji Tuhan, Boni semampai bisi ditisi aku meri aku peransang nerus pekit nya ngujungka iya enda tinduk nyaga aku nyentuk gerai.

“Pemakai, latih belagu di rumah enggau ti bukai endang dipatau iya magang lalu iya mih ti nyadi menijar aku, ngatur langgur pengawa aku merindang sereta nyempulang aku merindang kin kia siang malam.

“Nya alai, aku beterima kasih ngagai bala pengatur program ti meri aku peluang merindang ba program sida. Terima kasih ke sukung kita,” ku iya.

BEKUNSI PANGGAU
Lebuh dirandau pasal juluk diri, Melissa madah, iya ngarap ulih bekunsi panggau enggau artis Dayak ti tebangkar tauka bala artis veteran.

Kebuah pia, ku iya, laban iya penanyi baru lalu mayuh pekara patut dipelajarka iya ari artis bukai bepenau enggau nunda singkang sida baka artis Dyanne Oshield, Mary Unding, Dayana Shini, Phoebe Chloe, Veronica Natasha enggau ti bukai.

Tampung iya, kitai betuah laban industri muzik kitai majak kreatif ba mayuh sukut seraris enggau pemansang teknologi moden kemaya hari tu.

“Lain artis, lain ga kreativiti sida dikena matak ‘viewer’ lalu aku deka belajar ari sida ti udah bepenau enggau mayuh peneleba,” ku iya.

Ngagai bala artis baru baka iya, Melissa ngelalau sida patut berani pansut ari zon nyamai, anang takut nguji pekara baru lalu pajakka minat kita.

“Anang enggau belajar ari sida ti udah lama dalam industri enggau mayuh peneleba sereta seruran ngemaruhka diri empu.

“Anang ngemanaka jaku ti tau ngelabuhka kitai tang ambi nya nyadi ke peransang kelimpah besabar.

“Pechaya mih, tentu bisi jereki benung nganti kitai di mua lalu merindang mih enggau ati lurus,” ku lalau iya.

TERUS NYUKUNG
Penanyi bajik beumur 22 taun nya ngena peluang berega tu meri terima kasih ngagai semua orang ti semampai bisi ditisi enggau nyukung iya.

Kelebih agi, ku iya, bala peminat iya enggau sida sebilik nyengkaum apai enggau indai, bala menyadi, entua, ipar enggau ‘Sulu Ku Sigat’ kelimpah bala bakih enggau kaban belayan.

“Terima kasih ke sampi, peransang enggau sukung kita semua. Enti nadai kita, tentu aku enda ulih nyapai juluk diri tu lalu terus ke sukung kita.

“Aku mega minta ampun enti bisi pengurang enggau penimpang sekumbang merindang ngelama tu laban agi baru bendar ba dunya pemerindang tu lalu aku deka ransing agi belajar,” ku Melissa.

Sebedau ngujungka randau, Melissa madah, ba bulan Februari 2025, iya deka ngeluarka produk minyak angi ti ngena chap iya empu sereta bekerejasama enggau BiuBiu Beauty.

Nya alai, iya ngarap semua proses ngeluarka produk minyak angi nya lanchar sereta nerima sukung tegut ari peminat minyak angi.