Menteri Besai patut beratika baru MA63

KUCHING: Tujuh Gerempung Ukai Perintah (NGO) bepelasarka Dayak di nengeri tu ngansak Perintah Besai betuaika Menteri Besai (PM) Tan Sri Muhyiddin Yassin beratika baru Sempekat Malaysia (MA63).

Dalam siti penerang begulai kemari raban NGO tu diarika Pemungkal Gerempung Pemikir Dayak Sarawak (DTTAS) Willie Henry Majeng, Sapit Presiden DTTAS Edward Awan, Sekretari Besai Gerempung Balang Balai Nyabong (BBN) Dr John Brian, Sekretari Gerempung SADIA (Miri) Rafael Dru, Presiden Gerempung Terabai Menua Sarawak Wilfred Nissem, Presiden Gerempung Kaul Tanah Hak Adat Bansa Asal Sarawak (Tahabas) Romuald Siew, Presiden Kongres Nasional Dayak (DNC) Paul Raja enggau Presiden Gerempung Iban Sarawak (Pais) Samuel Suring madah maya mantaika Bajet 2022 Perintah Besai bisi ngungkupka agih belanja ngagai Orang Asli, India enggau China tang agih ke sama nadai nyengkaum bansa Dayak.

“Chukup sinu beratika bansa Dayak di Sarawak baka ke nadai di menua tu laban nadai nerima sebarang agih belanja ari perintah besai.

“Pia mega ari penyampau peranak di menua tu, bansa Dayak enggau bansa Kadazan, Dusun, Murut enggau Rungus (KDMR) di Sabah urung 2 juta iku nguan menua tu, tang bela nadai nyengala berupai nerima agih belanja ari perintah besai,” ku penerang nya.

Nya alai, dini pengilap nya enti iya dikumbai ilap. Kitai nadai ngembuan sebarang penerang baka ni agih belanja nya dilanggur.

 

“Nyadi sebuah bansa majoriti di Sarawak, bansa Dayak agi mayuh tinggal ari sukut pemansang enti dibanding enggau bansa bukai.

Willie Henry Majeng

“Pekara tu balat ngirauka ati laban bansa Dayak deka terus tinggal nyema enda diberi perati dalam arus pemansang,” ku tandu penerang nya.

Ku sida, bida ti amat nyata enti dipeda tikas perengka guna pemun baka jalai alun, sekula, klinik, arus penyambung, bekal ai beresi, bekal kuasa karan enggau ke bukai ba genturung pendiau bansa Dayak agi jauh tinggal.

“Nya alai, kami minta Menteri Besai meri perati mansik baru semaya ti kala ditanggam ba Sempekat Malaysia 1963 (MA63) ti dijamin dalam Konstitusyen Perintah Besai.

“Sebagi ari pekara pemun dalam sempekat tu, adil pemansang entara Malaya, Sarawak enggau Sabah nya alai Menteri Besai patut ngagihka agih belanja khas ngagai bansa Dayak,” ku penerang sida.

Berebak enggau nya, penerang nya madahka siti ari peminta pemadu beguna rayat Sabah enggau Sarawak dalam MA63 iya nya nyamin hak Orang Asal Sabah enggau Sarawak.

“Pia mega, Konstitusyen Perintah Besai dalam MA63 patut ngenukuka bansa Dayak nyadi bansa rasmi ti diguna dalam semua pom rasmi perintah nganti jaku lain tauka Bumiputera Sarawak.

“Pekara tu mesti dipejalai enggau lengkas,” ku penerang begulai nya seraya madah status asal menua tu nyadi ‘bakih kunsi’ dalam Serakup Malaysia patut dipulaika baru lalu lalu ‘status’ nengeri baka ke digaga ba taun 1976 kebendar enda patut nyadi.

Paul Raja

 

Dr John Brian

 

Romuald Siew

Suara Sarawak