PENGAWA miring siti ari tradisyen komuniti Iban ti mungkur pengawa besampi ngagai aki ini enggau petara.

Pengawa nya diatur dikena minta berekat, ibun, pengelantang sereta diseliah ari pekara ti enda manah.

Pia mega, pengawa miring dikena minta pengaya enggau pengelantang idup kelimpah dikena ngingat pesaka budaya ti diturun ari aki ini kitai kelia.

Tuai biau, Barau Tak, 70, madah, sebedau ngepun pengawa miring, perengka dikena miring meseti disedia. Iya madah, nya nyengkaum pinggai engkah piring, ai tuak, sirih, pinang, manuk sabung, pulut, tumpi, rendai enggau ti bukai.

Semua perengka nya diengkah ba pinggai lalu ditusun nitih ripih lalu disampi ke Lemambang ti ngetuai ke pengawa nya.

Manuk deka disayat nyadi genselan ba pengawa miring lalu darah iya deka dipesi.

Bulu manuk nyadi lambang penyambung sampi enggau bunsu Petara.

Udah nya, lemambang deka besampi minta pengelantang, berekat, jereki enggau dijaga ari utai enda manah.

Barau madah, pengawa miring ukai semina ritual pengarap lama enggau main asal aja tang mandang semangat penyerakup ba komuniti Iban.

“Nengah adat tu, semua serap komuniti deka begempuru, beripai enggau bebasa ke pangan diri,” terang iya. – RJ