ARTIKEL

ANANG MASAU PELUANG... Raban indu diperansang masuk Pekit MSWM Borneo 2024 nyadi siti pelasar dikena nyapai juluk sida enggau ngangkatka raban nya.

Miss & Mrs Stellar World Malaysia 2024 siti peluang manah dikena ngangkatka penau enggau pemajik

Facebook
Twitter
LinkedIn
WhatsApp
Telegram

DIKENA ngangkatka raban indu ba menua tu, Mrs Global Asian 2023, Kimi Tomas meransang raban nya masuk siti pekit kumang ti mungkur dua kategori iya nya Miss Stellar World Malaysia enggau Mrs Stellar World Malaysia (MSWM) 2024.

Ungkup penerang, ku iya, Pekit MSWM 2024 nya diatur begulai Kimi Tomas Empire enggau DCC Present Sdn Bhd nengah kerejasama Kelab Seni Budaya Anak Sarawak (KESERA).

Iya madah, perais besai ti mungkur perais mata duit, selampai, trofi enggau setipikit basa benung nganti bala pemenang kelimpah bepeluang ngarika Borneo enggau Malaysia ba pekit nya ti deka diatur ba Amerika Syarikat ba taun baru.

ANANG MASAU PELUANG
Berebak enggau pekit nya, sebengkah program nguji penau deka diatur dikena milih pengari ari Borneo ba Pekit MSWM 2024 ti deka diatur ba bulan Ogos tu ba Kuala Lumpur.

Program nguji penau nya deka diatur ba bulan March tu ba sekeda palan ti udah dipilih ba Sarawak enggau Sabah.

Entara palan ti mujur dipilih ungkup ngatur program nguji penau nya baka palan bebeli barang Riverside, Kuching kena 2 March, Temu Café, Bintulu (7 March) enggau Hotel Kingwood, Sibu (9 March).

Nangkan nya, program sebaka deka diatur ba Miri kena 29 March enggau Kota Kinabalu, Sabah kena 30 March tang palan ngatur program nya deka diputus enggau dipadah pengudah tu.

Mensia mayuh kelebih agi raban indu ti deka nemu silik bekaul program nguji penau nya diperansang nitih Facebook enggau Instagram Miss Stellar Malaysia tauka betelefon terus ngagai lumur 018-3983136.

Pekit kumang nya dibuka ngagai semua raban indu sekali ke agi bujang tauka udah belaki ti ngembuan peninggi minimum 150 sentimeter, berat maksimum 80 kilogram, beumur 18 taun enggau tuai agi ari nya sereta siruka hijab.

Baca lain  Serakup Ngasi Sarawak besampika pengarap meri kitai pengelantang

“Pekit MSWM Borneo 2024 deka diatur ba Kuching, Sarawak ba bulan June tu lalu lima iku pemenang pemadu atas (Top 5) ari Sarawak enggau Sabah ba kededua kategori nya deka dipilih ngarika Borneo ba Pekit MSWM 2024.

“Udah nya, dua iku pemenang ba Pekit MSWM 2024 deka ngarika Malaysia besemekih ba Pekit Miss & Mrs Stellar World ti deka diatur ba Amerika Syarikat ba taun 2025.

“Nengah sukung penuh semua, raban kami ngembuan pengandal ati besai ulih betemu enggau bala penyereta rambau program nguji penau enda lama agi,” terang Kimi.

Iya ti mega Direktor Nengeri Borneo enggau Duta Pengawa Negapka MSWM 2024 madahka lagu iya ti pejuluk Divine Love endang ditengkebang khas ungkup raban indu ti ngemeranka pekit kumang.

Iya madah, lagu ti meri inspirasyen ngagai raban indu nya ulih dipeda enggau didinga ba pelasar YouTube enggau ti bukai.

KIMI TOMAS

PELASAR NEMBAN NEGAP RABAN INDU
Pekit MSWM 2024 nya ukai semina pekit tang nya sebengkah insiatif dikena ngembing enggau nyukung bala penyereta besemekih nengah pelasar ti nemban.

Nya alai, Kimi meransang raban indu ari selampur Malaysia kelebih agi Borneo enda masau peluang nyikap diri masuk program nguji penau nya.

“Tuju kami ngatur pekit tu dikena meri peluang, inspirasyen, ngembing enggau negapka raban indu sekali agi bujang tauka udah belaki ngambi berani mandangka diri ba panggau MSWM sereta tampak baka bintang.

“Tunga kuing ti tampak udah nganti raban indu ti ngembuan juluk enggau pengandal ati ti besai ngagai diri empu nengah pekit tu.

“Seagi-agi kita enda mudah nyerah alah, kita sigi enda puntan ngapa laban penyulut besai nya ditentuka kitai empu lalu ukai ditentu orang bukai,” ku iya.

Baca lain  MA63 ukai diperunding tang dikeamat

Pekara nya bela disukung siku pedagang nyulut ti mega pemungkal DCC Present Sdn Bhd, Sherlyn Chan Seet Leng.

Ku Sherlyn, MSWM nya lebih ari siti pekit tang nyadi siti pelasar dikena negap raban indu ba pengawa bekunsi peneleba, juluk enggau penyulut besai.

“Aram meh kitai ngerami semua sukut pemajik sereta mai ubah besai ba luar panggau tu (komuniti) dikena mechahka mayuh ari pemar lalu ngerandang jalai ungkup rebak dudi,” ku iya.

Ba luar pangku pengawa iya nyadi pengatur program, Sherlyn chakah meransang raban indu nempa kreativiti enggau inovasyen ba bemacham sukut nengah mayuh pelasar lalu MSWM siti ari pelasar nya.

Ungkup penerang, DCC Present Sdn Bhd nya sebuah serikat pengatur program ti bepalan ba Malaysia ti chakah negi pemeruan.

SHERLYN CHAN SEET LENG

NYAGU PENYELAI MALAYSIA
Kimi madah, MSWM nya pelasar ti nemban dikena bekunsi budaya, pesaka main asal enggau penyelai Malaysia kelebih agi Borneo ngagai serata dunya.

Pekara nya, ku iya, ukai semina mantu ngangkatka raban indu aja tang nyukung dagang temuai enggau pemansang ekonomi menua tu empu.

“Tu mega siti pelasar manah dikena ngempung rayat, ngangkat nama manah menua sereta negapka pengelantang enggau pengelikun.

“Nya alai, nengah pekit tu, kami chakah meri inspirasyen ngagai raban indu sekali ke agi biak tauka udah beumur ba Malaysia dikena nyapai juluk sida.

“Aku pechaya nengah pengawa ngelakuka ulah ti manah enggau pengandal ati ti besai, pekit tu ulih nyungkak ngagai gaya inklusif kelimpah nyukung industri pekit kumang Malaysia,” terang iya.

Iya madah, laban Malaysia diuan bemacham pupu bansa enggau etnik sereta ngembuan bemacham budaya, udah tentu MSWM deka bebasaka budaya lokal ba genap sukut pemajik.

Baca lain  Dua rengka dalam, kaki kanan ditemu

TERUS NABUR BUDI
Sherlyn ti mega Direktor Nasional MSWM madah, inisiatif nya dikeandal ulih ngedut takah pemajik enggau advokasyen raban indu.

Iya madah, MSWM nya sebengkah pelasar ti nemban dikena nambah penyedar enggau mai ubah manah ukai semina ngagai raban indu tang komuniti mega.

“Aku mega siku ex-kumang bajik lalu pekit nya mujur ngubah pejalai pengidup aku sereta mantu aku mechahka adan enggau penemu ti bechiping.

“Nengah pelasar tu, aku ransing ngangkatka diri empu, terus besemekih enggau negapka raban indu.

“Diatu aku ngalih ngagai sektor dagang kelimpah ngesan pangku pengawa nyadi Direktor Nasional MSWM.

“Nya alai, juluk besai aku sigi deka meri inspirasyen enggau ngangkatka raban indu ba selampur menua tu,” terang iya.

NOREENY MANGGIE

BEGULAI NYAPAI JULUK BESAI
Penulung Direktor Nengeri MSWM Borneo, Noreeny Manggie madahka diri semampai meri kerejasama penuh ngagai Kimi ba pengawa negapka raban indu nyapai penyulut besai.

Noreen ti dichiri nyadi Duta Mrs Plus World Malaysia 2024 ngembuan pengandal ati ti besai ngagai diri empu sereta chakah mantu enggau meri inspirasyen ngagai raban indu ti besai tubuh ngambi sida enda ngemaruhka diri.

“Indu ngelambangka pengaya enggau kuasa. Nya alai, raban tu ngesan pangku pengawa besai ba komuniti lalu genap ruang bilik bepanggai penuh ba sida ninting hari.

“Sida nyelai laban ulih ngesan mayuh pangku pengawa ba siti awak lalu sida meh indai, bini, pengintu ruang bilik, mela pemakai, pengajar, bakih, indu misi enggau ti bukai.

“Aku pechaya mayuh indu ba luar dia ngembuan bemacham penau, nya alai, aku nyukung pelasar tu dikena mantu raban indu kelebih agi ba Borneo ngangkatka diri empu,” ku iya.

BERITA LAIN

RM10,000 nganti Kumang Gawai Betong 2024

BETONG: Pekit Kumang Bagi Menua Betong 2024 nesau bala indu dara bansa Dayak selampur menua Malaysia ke beumur 18 taun enggau tuai agi ngerebut perais

Jini ninga indai manjung tiga kali

KUCHING: Anak tudah ti dipelaba ditagup jagu ba Sungai Rayu, Jalai Selang Lundu kena Hari Tiga tu tadi bisi ninga indai iya manjung tiga kali

BERITA TERBARU

Kenangan raya terkurung, terkejut

JIKA ditanya mengenai tempoh paling menyeronokkan menyambut Hari Raya Aidilfitri, sudah pasti kebanyakan kita akan memilih zaman kanak-kanak. Apa tidaknya, ketika itu kita tidak perlu