KUCHING: Mulu Eco Challenge mandangka pengeran Sarawak ngemansang produk dagang temuai berega enggau meruan nipak juluk nyadi nuju 2030.
Nya pekara dipadah Menteri Dagang Temuai, Industri Kreatif enggau Seni Pemerindang Sarawak, Dato Sri Abdul Karim Rahman Hamzah bekaul Mulu Eco Challenge 2026 ti datai baru ungkup edisyen ketiga kena 29 Mac tu ba Mulu Marriott Resort & Spa.
Ku iya, pengawa baka nya beguna endar dikena ngelaku Sarawak nyadi palan dagang temuai meruan tikas global kelebih agi ba segmen eko-dagang temuai enggau pejalai.
Pengawa nya dipadah ba siti aum pemberita kena Hari Tiga ti dipenyadi iya.
Ku raban pengatur, Grit Event Management, edisyen sekali tu disadang matak entata 90 ngagai 100 penyereta ngaul 25 tim nyengkaum penyereta antarabansa ari Brunei enggau Singapura kelimpah Sabah sereta Semenanjung Malaysia.
Pengawa baka tu dipeda nipak inisiatif perintah Sarawak ngemansang sektor dagang temuai besai kelebih agi ba segmen pejalai enggau eko-dagang temuai.
Bepalan ba Gunung Mulu National Park, bala penyereta deka napi ekspedisyen nyengkaum belanda nujah tebing sungai enggau aktiviti rakit buluh seraya nyendia peneleba baru ba rampa menua ti diaku dunya.
Ba pekara bukai, Mulu Eco Challenge mega dikemansang nyadi sebagi ari pelasar Borneo Raft Safari ti ngempuru pengawa rakit ai ba nengeri tu.
Direktor Lumba Mulu Eco Challenge 2026, Awang Saifeluddin ari Grit Event Management madah ke disyen ketiga nya mujur matak 25 tim seraya nerima timbal ti chukup manah dibanding taun ti dulu.
“Ungkup edisyen ketiga tu, kitai mujur matak 25 tim. Ari sukut penyereta aja, kitai meda urung 100 iku ngambi bagi.
“Enti dipegulai enggau diri sebilik sereta menijar tim, kitai ngadang urung 150 iku deka datai ngagai Mulu Eco Challenge,” ku iya.
Inisiatif nya mega ngenap aktiviti bukai baka Padawan Raft Safari, Selangau Raft Safari enggau Mukah rafting, seraya negap chap dagang Sarawak ba segmen dagang temuai sungai enggau pejalai.
Nengah perais sepenyampau RM10,000 ti bisi disedia, bala penyereta ukai semina ulih besemekih ba Mulu tang mega ulih ngulu lumba ti besai agi ba selampur Sarawak.
Pengawa baka tu nipak Strategi Pemansang Pengudah 2030 Sarawak (PCDS 2030), kelebih agi nyukung pemansang ekonomi meruan, ngintu rampa menua enggau pemansang dagang temuai besai.
Pemujur pengawa nya mega disukung kerejasama mayuh raban nyengkaum Sarawak Tourism Board ari sukut promosyen, AirBorneo nyadi serikat penerebai rasmi sereta Mulu Marriott Resort & Spa nyadi hotel rasmi.
Sama datai, Kaban Kunsil Nengeri (ADUN) Mulu, Datuk Gerawat Gala. -EDISI UKAS
