BARCELONA: Sarawak majak ke pengeransing ngerembai kerejasama global nyengkaum ngatur randau begulai enggau Huawei, siti kompeni teknologi tebilang dunya maya Mobile World Congress 2026 (MWC 2026).
Inisiatif nya nyadi chara ngenegap infrastruktur digital enggau utiliti pintar ke mai pemaik ngagai rayat di nengeri tu.
Pengawa ti diuluka Sapit Menteri Utiliti enggau Telekomunikasyen Sarawak, Datuk Liwan Lagang nya bekaul pekara bungkur digital betikas tinggi, sistem utiliti pintar, teknologi ‘artificial intelligence’ (AI), ‘cloud computing’ enggau chara mutar bepelasarka data.
Ku iya, pengeransing ngenegap kerejasama antarabansa nya seriris enggau tuju juluk ati Sarawak ba Pelin Pemansang Udah COVID-19 2030 (PCDS 2030) ke deka nyulut ba ekonomi digital moden enggau hab inovasyen serantau.
“Kerejasama strategik baka tu beguna dikena nentu transformasyen digital Sarawak ukai semina disebut aja tang digaga pulaika pemanah tikas pengidup rayat nengah arus internet ke lebih manah, sistem utiliti betikas tinggi enggau peluang ekonomi baru,” ku iya maya pengawa nya, Hari Satu tu tadi.
Iya mega madah, Huawei ke tebilang ba teknologi pemadah enggau komunikasyen ngembuan pengelandik ba pemansang bungkur telekomunikasyen betikas besai, platform digital pintar enggau kuasa digital meruan.
“Pengelebih dikembuan Huawei tu seriris enggau pengeransing ngenegap ekosistem digital enggau utiliti Sarawak,” ku iya madah baru.
Kelimpah ari nya, iya ngarapka randau maya nya deka ngerandang kerejasama ba pekara telekomunikasyen, utiliti pintar, platform digital enggau pemansang kapasiti ti deka mai pemaik ngagai Sarawak.
“Aku temegah ati ulih ngatur pengawa berandau enggau Huawei tu serimbai MWC 2026.
“Rikod ke dikembuan Huawei endang tebilang ti nyadi lalau beguna amat ngagai Sarawak bekaul nyungkak ekosistem digital enggau utiliti,” pia ku iya.
Deligit Huawei maya nya betuaika Chao Xie, Mandal Presiden, Opis Pekara Perintah Global, Yanqing Lin, Penyanding Penemu, Opis Pekara Perintah GlobaL, Fei Xu, Presiden Makit Luar Menua, Unit Digital Servis Global Huawei, Yidong Wang, Direktor Opis Dagang ICT APAC, Simon Sun, Tuai Pegawai Eksekutif Opis Pengari Malaysia, Xianjun Du, Sapit Tuai Pegawai Eksekutif Opis Pengari Malaysia enggau Wei Wan, Mandal Presiden Opis Dagang Malaysia Timur.
Sama bela datai maya nya Chairman Sarawak Digital Economy Corporation (SDEC), Tan Sri Datuk Amar Mohamad Morshidi Abdul Ghani, Kaban Komiti SDEC, Dato Ir Janang Bungsu, Sapit Sekretari Mendam Opis Menteri Utiliti enggau Telekomunikasyen (MUT), Syed Mohamad Fauzi Shahab, Manijer Besai Sarawak Multimedia Authority, Dato Dr Anderson Tiong Ing Heng, Tuai Pegawai Eksekutif SDEC, Dato Ir Ts Sudarnoto Osman, Tuai Pegawai Eksekutif SMD Semiconductor, Shariman Jamil sereta bala pegawai ari opis enggau agensi di Sarawak. -EDISI UKAS
