SARIKEI: Mensia mayuh dilalau enda nyadung berita bula ti nadai temu pengamat berebak ari dawa ba media sosial ti madah ke tikas ai majak niki lalu ngujungka Sarawak Energy Berhad (SEB) muai sekeda ai ari Tekat Ai (HEP) Bakun.
Sapit Premier Sarawak, Datuk Amar Douglas Uggah Embas mantah dawa nya seraya madah ke nadai pengawa muai ai di tekat nya.
“Bisi penerang ti dikunsi ba media sosial madah ke SEB muai ai ba HEP Bakun. Nadai pekara baka nya nyadi. Nya semina bula aja,” ku iya.
Uggah mansutka jaku nya rambau ngabas taba Jalai Besai Pan Borneo ba simpang Jakar ditu, sehari tu.
Iya ti mega Menteri Pemansang Infrastruktur enggau Penyangkai Kapal meri jamin ngagai mensia mayuh SEB ngasika atur operasyen standard (SOP) ti terit ba pengawa muai ai dikena nyeliah empas ngagai komuniti ba ili.
“Nya alai, kami ngarap mensia mayuh enda nyadung berita bula sereta ngamahka nama manah ejensi nya,” ku iya.
Nangkan nya, SEB nengah pemantu servis penguna tali arus sida, ‘Carina’ mutar isu nya ba sebengkah penerang Facebook kemari ngerah mensia mayuh bejimat ngagai penerang bula ba tali arus.
“Tikas ai ba HEP Bakun agi ba tikas operasyen ti likun. Nadai pengawa muai ai dipejalai ba Tekat Bakun,” ku sida.
Serikat utiliti ti diempu nengeri tu ngelalau mensia mayuh meresa website rasmi SEB enggau media sosial rasmi sida dikena ngulih penerang ti amat.
Ungkup penerang silik, mensia mayuh ulih betelefon ngagai Palan Servis Penguna SEB ti beoperasyen 24 jam seminggu ba lumur 1300-88-3111 tauka nengah aplikasyen SEB Cares.
