Nama agi dianti KPM?

BETONG: Gaya rampa taba baru disediaka Perintah Sarawak ngagai Opis Menteri Pelajar Malaysia (KPM) bejalaika projek Ngentak Baru SK Sebemban agi gadung lalu nadai bekau dikereja ngasuh mayuh raban asa.

Nitihka pematut projek tu berengkah dipejalai dalam bulan Mac tu tadi lalu apin dikereja ari gaya ti diperati.

Adun Saribas Mohammad Razi Sitam lebuh mantaika mosyen masa jaku TYT Sarawak Tun Taib Mahmud beserimbai enggau Aum Keterubah Penggal Keempat DUN Sarawak Ke-18 dekaka pelajai projek ngentak baru SK Sebemban dirumban.

Iya madahka pengasa diri lebuh dirandau Suara Sarawak.

“Nama kebuah bedau berengkah digaga? Sebedau tu aku kala dipadah projek tu nitihka pematut berengkah digaga bulan Mac taun tu.

MOHAMMAD RAZI SITAM

“Nya kebuah Perintah Sarawak ngena belanja penyampau RM195,375.25 dikena mayar pampas tanah pemesai 48,573.8 meter persegi taun nyin tadi nentuka kereja ngentak baru begunan sekula ulih dipejalai enggau naka penyampat,” ku iya.

Pengawa tu patut dirumban laban tanah tebing sungai majak tusur lalu ngeruga pengelikun begunan sekula, ku iya.

“Tanah dia majak tusur lalu sida ke ba sekula majak irauka pengelikun diri,” ku iya nambah.

Seraya Ketuai Genturung Pendiau Kampung Sebemban Marawi Lepor madah, irauka pekara pengelikun sekula ke alai peranak menua nya ngansak KPM ngamatka semaya sida.

“Anang udah penusah nyadi baru deka nasal. SK Kampung Buda nyadika teladan semua kitai lalu kami ditu enggaika penusah bukai nyadi.

DITU… Marawi nunjukka taba ngentak baru begunan SK Sebemban disediak Perintah Sarawak.

“Nya kebuah kami andal amat bala anak ulih belajar dalam rampa ti meruan enggau lantang sereta likun,” ku iya.

Marawai mega ngarapka Perintah Besai ulih ngerumban pengawa ngentak baru begunan SK Sebemban.

Perambu projek ngentak baru enam kelas enggau enam rumah pengajar SK Sebemban deka dientak ba sebidang tanah di genturung pendiau nya.

SK Sebemban diatu bisi 11 iku pengajar enggau 87 iku nembiak.

 

ENDA LIKUN… Gaya pendiau begunan SK Sebemban dientak tebing sungai.

 

ENDA LIKUN… Gaya pendiau begunan SK Sebemban dientak tebing sungai.