KAPIT: Program Komuniti Nadai Tibi ke diatur serimbai Pengerami Ngiling Bidai di Rumah Juntan, Nanga Elik mujur nambahka penemu peranak menua pesisir pasal pemesai guna nyaga pengerai, kelebih agi ba pengawa nagang enggau nyidi tumu penyakit tibi.
Program diatur Klinik Pengerai Nanga Bena enggau kerejasama mayuh ejensi perintah sereta bala tuai raban bansa menua nya, ke bela nyadi pelasar nyempil kaul entara peranak enggau ejensi gawa, kelimpah ari ngintu pesaka budaya peranak menua.
Kaban Kunsil Nengeri (ADUN) Pelagus, Wilson Nyabong Ijang, madah program baka nya beguna endar dikena nyeridi peranak pasal pengeraya nyidi tumu enggau berubat penyakit tibi.
“Kerejasama semua raban beguna endar nentuka pengawa nyidi tumu enggau berubat ulih dipejalai, nemban sereta muai peragam penemu enda manah pasal pesakit tibi,” ku iya.
Iya bejaku munyi nya ba Program Komuniti Nadai Tibi enggau Pengerami Ngiling Bidai di Rumah Juntan, Nanga Elik, kena Hari Minggu tu tadi.
Wilson mega nyemetak madah program nya ukai semina meri pemaik ari sukut pengerai mensia mayuh aja, tang mega nyempil kaul entara rayat, bala tuai enggau ejensi perintah.
Sama datai, Sekretari Politik Menteri Kereja Raya, Datuk Alvin Runggah Jimbun, ke ngari ke Menteri Kereja Raya, Datuk Sri Alexander Nanta Linggi; Sapit Residen Bagi Menua Kapit, Robert Liman Deli; Penyeraris Palan Servis Parlimen Kapit, Ambrose Abong Bugek; Tuai Rumah Juntan sereta bala tuai opis enggau agensi perintah nengeri enggau Perintah Besai.
Pengerami nya mega diisi enggau pengawa miring enggau simbolik ngiling bidai kena nutup pengari Gawai Dayak ba rumah panjai nya ungkup taun tu.
