KUCHING: Pengelebih datai ari menua pesisir meri empas besai ngagai Sarawak lebuh Kaban Parlimen Kapit Datuk Seri Alexander Nanta Linggi dipadu nyadi Menteri Kereja Raya.
Menteri Dagang Temuai, Industri Kreatif Enggau Seni Pemerindang Datuk Seri Abdul Karim Rahman Hamzah madah, Sarawak berasai betuah laban Opis Menteri Kereja Raya nya agi dipegai menteri ari Sarawak.
Ku iya, opis menteri nya sebedau tu dipegai Datuk Seri Fadillah Yusof ke alai sekali tu iya dipadu nyadi Sapit Menteri Besai.
“Menteri nyaga opis menteri nya sebedau tu Datuk Seri Fadillah lalu diatu pengawa nya ditampung Datuk Seri Alexander, seduai tu sama datai ari Sarawak.
“Aku pechaya sida (Perintah Besai) udah beratika peminta enggau penanggul ditapi Sarawak laban iya (Nanta) datai ari menua pesisir, iya nemu agi penanggul ditapi kitai ditu,” ku iya.
Karim bejaku munyi nya ba aum pemberita rambau bejadika Sarawak Road Trip di Waterfront Kuching ditu tadi.
