BETONG: Pemansang pelajar enggau raban nembiak ba Kunsil Nengeri (DUN) Layar majak disungkak ngena agih belanja RM245,000 nengah Projek Mit Pemansang Menua Pesisir (MRP).
Ari penyampau nya, RM235,000 diagih ngagai 11 sekula primari enggau sekondari lalu RM10,000 da diungkup ngagai Kelab Tenis Betong dikena nyaup gerempung nya ngatur program sida.
Sapit Menteri Raban Nembiak, Lumba enggau Pemansang Orang Dagang Sarawak, Datuk Gerald Rentap Jabu madah, pemeri nya mandangka pengeransing iya negapka agi sektor pelajar ti nyadi pugu pemansang modal mensia.
Iya ke mega Kaban Kunsil Nengeri (ADUN) Layar madah, Sarawak diatu begunaka orang gawa ti dinamik sereta tikas tinggi dikena nipak guna industri moden, seriris enggau tuju skim pelajar pechuma di nengeri tu.
“Nya alai, aku minta sekula kelebih agi Kepala Pengajar meri penerang tumu ngagai nembiak senentang kuing tuju kelebih agi peluang gawa ke bisi di Sarawak,” ku iya madah.
Rentap bejaku munyi nya maya pengawa nyuaka chek pemeri nya ditu, kemari.
Rentap mega madah ke pemesai reti kerejasama apai indai, sekula enggau pengari rayat ba pengawa nentuka pemujur pemansang pelajar bala anak.
“Kitai meseti besaup senentang pekara tu.
“Besaup nempa pemujur nembiak ba pelilih Betong,” ku iya baru.
Bekaul pelajar digital, iya ngarap inisiatif meri tablet pechuma ngagai nembiak sekula sekondri ulih dikena manah.
Kelimpah ari nya, iya ngansak bala pengajar bela bekenaka teknologi moden ngemujur pengawa sida ngajar nembiak. – EDISI UKAS
