Nembiak rinduka pengajar Nancy bengepan

SIKU pengajar Pom Enam ti mega Ketuai Panitia Jaku Melayu STPM ba Sekula Sekondari Perintah (SMK) Merbau, Miri, Sarawak ransing ngajar bala nembiak kelimpah berundingka bemacham chara nentuka bala nembiak gagit belajar nengah online.

Kemari, Pengajar Nancy ngerasuk pekayan asal bansa Bidayuh ungkup Google Meet ba Hari Ke-49.

Sebedau tu, Pengajar Nancy Maria udah ngerasuk sari, ngepan Iban enggau pekayan asal bansa Melanau lebuh ngatur kelas online ungkup bala nembiak iya.

Mensia mayuh muji inisiatif dipejalai Pengajar Nancy Maria ngena pekayan asal lebuh ngajar nembiak nengah online kelimpah ngembuan gamal nadai endur mantah.

Bemacham inisiatif dipejalai benama Pengajar Nancy ngambi bala nembiak gagit ngulu kelas online nya.

KREATIF… Nama Pengajar Nancy dikelala mensia mayuh pengudah iya ngena sari lebuh ngatur kelas online.

Tu nyengkaum ngena bemacham pekayan asal, ngubah bilik endur ngatur kelas online, nukar selap mija ngajar nitihka pekayan asal dikena iya lebuh nya.

Pengajar Nancy madahka chara nya meri peransang ngagai iya ransing agi ngajar bala nembiak nengah online.

“Aku dekaka bala nembiak gaga enggau gagit nganti ngulu kelas nengah Google Meet.

“Pia mega, aku dekaka bala nembiak tu rindang maya belajar online,” ku Pengajar Nancy ti keran nentuka semua nembiak enda tinggal pelajar.

Ku Pengajar Nancy, iya naka ulih ngajar ba rumah nengah online taja ngajar nengah online nya kiruh agi ari kelas ngelama tu.

PEKAYAN ASAL BIDAYUH… Kemari, Pengajar Nancy ngerasuk pekayan asal Bidayuh ungkup kelas online ba Hari Ke-49 nengah Google Meet.

Nambahka nya, tu mih chara ke patut dipejalai nentuka bala nembiak enda tinggal pelajar sekumbang pengerekai Covid-19 tu.

Nangkanka nya, Pengajar Nancy madahka mayuh penemu pasal teknologi baru dipelajar iya.

“Mayuh amat penemu baru pasal teknologi baru kelebih kami pengajar lama ti baru belajar pekara tu.

“Ari nadai ngelala nama guna Google Meet, Google Classroom, ngaga kuiz nengah online nya, kami naka ulih belajar taja pekara tu ukai muntang dikereja.

“Aku empu pen nangi ngena Google Meet, nangika bisi utai salah tekan dia.

PUH… Pengajar Nancy puh ngajar nembiak taja bekenaka ngepan Iban.

Ku iya, mayuh peneleba baru diasaika sida sekumbang ngatur kelas online ketegal pengerekai Covid-19.

Bala pengajar endang ngembuan siti tuju deka ngiri penemu nggaai bala nembiak nentuka sida enda tinggal pelajar maya sekula ditutup.

Ngelansa pasal pekayan asal dikena Pengajar Nancy nyengkaum sari, ngepan enggau pekayan Dusun Tatana nya endang koleksyen iya empu.

“Tu endang koleksyen aku empu.

“Ari dikena sekali aja enggau ditaruh dalam jemari, manah aku ngena nya maya kelas online ngambi narit perati bala nembiak,” ku Pengajar Nancy seraya tuchum manis.

NGAJAR… Nama Pengajar Nancy majak dikelala pengudah iya mantaika pengelain ngerasuk pekayan asal lebuh ngajar nengah online.

“Google meet Semester Satu udah tembu lalu udah tu nampung ngatur kelas online Semester Tiga,” ku iya nerang.

Pengajar tu ngembuan runding ti kreatif ungkup bala nembiak kelimpah iya madahka nembiak ngulu magang lebuh kelas online nya.

Nya alai, semangat dikembuan Pengajar Nancy tu patut nyadika peransang ngagai bala pengajar bukai ngambi mantaika pengelain mata ngajar kelas online.

Sebedau tu, Pengajar Nancy kala ngena sari lebuh Hari Deepavali ke alai siku aja nembiak ti ngulu Google Meet nya.

Pengajar Nancy ngena sari ukai mindah ke bukai tang semina deka mantaika pengelain maya ngajar nembiak betubuh 40 iku nya.

Taja siku aja nembiak ngulu kelas online lebuh Hari Deepavali maya ngajar kelas online Jaku Melayu STPM, Semester Satu pengelama dua taun.

“Taja pia, udah nya maya kelas ari pukul 7 ngagai 11 pagi, aku berasai gaga amat laban semua nembiak udah ngulu kelas online nya.

“Aku besampika bala nembiak tu nyulut dalam pelajar laban pengeransing aku ngelama tu udah nyapai pemujur,” terang Pengajar Nancy.

Ke penerang semua, Pengajar Nancy nya siku ari finalis Dewi Remaja taun 89/99.

Pengajar Nancy mega suah bekunsika resia nyaga pemanah tubuh nengah media rama iya.

Suara Sarawak