Nempa indu nyulut ba dagang pemakai

KUCHING: Kuching Skills College bekerejasama enggau Opis Orang Indu enggau Ruang Bilik Sarawak (JWKS) ransing nempa raban indu nyadi pedagang ba industri pemakai menua tu.

Nitih ku pengari palan pematih pengelandik nya, Novert Sullang, sebedau tu palan sida dikelala enggau nama SG Akademi Sarawak lalu dibali nama pengudah 100 peratus saham diempu peranak Sarawak.

Nengah Program Dagang Pemakai Indu ti diatur JWKS sereta dipejalai palan sida, Novert andal amat tuju enggau juluk inisiatif sida ngenegap enggau nempa raban indu nyadi ketuai deka mujur dijapai.

“Kami ngatur kus kulinari ungkup indai tunggal enggau raban indu ti datai ari ruang bilik seranta ngambika sida bisi penau enggau pengelandik ngaga utai pakai baka kuih ke dijual.

“Batang tuju pengawa kami enggau JKWS deka mai raban diselinting tu berani ngaul diri ba dagang pemakai lalu ulih nyungkak ekonomi ruang bilik sida laban kitai nemu pengulih sereta makit dagang tu chukup besai diatu,” ku Novert ti mega Ketuai Pemesai Eksekutif SG Akademi Sarawak lebuh dirandau Suara Sarawak ditu tadi.

NYINUK… Fasilitator program nerang chara mela pemakai nitihka standard makit enggau dagang produk pemakai kemaya hari.

Tuju ke bukai mega ku iya, deka nyaup ejensi enggau opis perintah bekaul mutar lalu ngemunaska penyeranta nengah pemansang pedagang ti fokus ngagai pemansang menua pesisir.

“Reti iya, kus ti disedia enggau dipejalaika nadai bebayar tu deka ngemansangka ruang bilik seranta ngagai tikas idup ti menyana agi, lantang lalu bisi penatai pemisi ti meruan.

“Kitai mega andal nengah kerejasama rat enggau ejensi baka JKWS tu ulih ngerumban pengawa mantu sida ti begunaka bantu ari latih ti seruran dipejalai kelimpah sanding penemu pasal dagang enggau produk,” ku iya ti mega Direktor Wilayah SG Education Group.

Pekara pemadu beguna ba program tu iya nya nempa rampa dagang ti meransang pedagang indu kelebih agi sida ti datai ari menua pesisir liat ati bedagang.

Pihak kolej mega keran ngansak bala penyereta program ngansah penau diri nipakka juluk palan nya ti meri peransang enggau nambahka asil produk dikeluarka pedagang, ku Novert madah nyemetak.

SAMA BELAJAR… Penyereta program bela belajar chara nyumai ti betul.

“Kitai sedarka raban indu antara raban ti napi mayuh pemar enggau penekul ba pengidup kelebih agi indai tunggal, melanja ruang bilik, anak besekula, ditambah enggau belanja idup ti tinggi diatu.

“Nya kebuah kami nyanggup bejalaika program ti diatur JKWS dikena mantu raban tu mutarka diri, ulih beridup enggau ati lantang sereta ngemansangka diri ba dagang.

“Dagang disereta raban indu kemaya hari udah mayuh berubah ke alai sida bisi tanggungpengawa sereta nempa pemujur ba pengawa dikereja,” ku iya berasai temegah.

Ngelansa pasal palan pelajar ku Novert, iya ditumbuh di Sarawak laban mayuh nembiak kitai ditu enti disebut belajarka pengelandik deka nampung pelajar ngagai menua Semenanjung.

“Ketegal sinu sereta ngenatika penusah nyengkaum tating belanja apai indai nganjung bala anak sida besekula jauh kelimpah belanja bukai, nya kebuah piak kami numbuhka sebengkah palan pengelandik kulinari tauka berapi ba industri hotel enggau dagang temuai.

“Kami mega ulih nyamin sida ti graduet ari palan tu endang bisi peminta tinggi ba makit kereja berindik ari pemansang industri hotel enggau dagang temuai diatu kelebih agi nangkup peminta Kimpin Nemuai Ke Sarawak (VSC) 2020.

“Kami mega nangkup peminta Perintah Sarawak numbuhka palan pengelandik laban Sarawak agi tubah begunaka pengereja bepengelandik dikena mansutka ekonomi pengudah menua tu ngatur Aum Besai Pelajar Teknikal enggau Latih Vokasional (TVET) Dunya dalam taun 2015 suba,” simpul Novert.

KENANG KAMI… Bala penyereta ti mujur nembuka Program Dagang Pemakai Indu ti diatur JWKS lalu dipejalai Kuching Skills College nerima setipikit sida.

Suara Sarawak