BEKENU: Raban nembiak di Subis diperansang nyerungkai sektor betanam betupi nyadi bidang dagang dikena ngepun penatai pemisi baru ke alai perintah nyendia bemacham program, perengkaguna enggau sukung.
Sapit Menteri Nembiak, Lumba enggau Pemansang Orang Dagang (Pemansang Orang Dagang), Datuk Dr Ripin Lamat madah, Subis bisi pengulih besai nempa mayuh agi agropreneur biak berindik ari sekeda komuniti menua udah bisi peneleba ba aktiviti bepelasarka betanam betupi, kelebih agi nanam sawit.
Ku iya, raban nembiak enda patut bepanggai ngagai siti komoditi aja, tang meseti berati ke peluang ba bidang bukai nyengkaum betanam betupi pintar, utai tanam sereta nupi manuk kampung, manuk betelu, kambin enggau chapi.
“Entara bidang ti ulih diserungkai nyengkaum nupi manuk kampung, manuk betelu, kambin enggau chapi kelimpah pengawa betanam betupi pintar nengah Palan Betanam Betupi Pintar ti disediaka Opis Betanam Betupi Sarawak (DOA) di Kabuloh,” ku iya.
Ripin madah munyi nya lebuh dirandau pemberita pengudah Pengawa Nutup Program Youth Entrepreneur Setup (YES) 3.0 – Agropreneur di Balai Komuniti Bekenu. Iya mega meransang pengempu tanah bedandang mit, nyengkaum tanah urung satu nyentuk dua ikar ti enda dikena, ngambi dikemansang ungkup aktiviti betanam betupi ti ulih nambah penatai pemisi.
Program YES 3.0 – Agropreneur nyadi pelasar meri penerang bekaul peluang, program enggau bantu perintah ngagai raban dituju kelebih agi nembiak beumur 18 nyentuk 40 taun.
Urung 300 penyereta nyengkaum nembiak, nembiak abis sekula enggau nembiak ba bidang bekaul betanam betupi ngulu program nya ti meri penerang bekaul perengkaguna enggau bantu disediaka Opis Menteri Nembiak, Lumba enggau Pemansang Orang Dagang Sarawak (MYSED), DOA sereta Opis Servis Veterinar Sarawak (DVS). — EDISI UKAS
