Nepan motosikal nadai betupi, menyadi biak bebadi nyawa

KUCHING: Penusah enda disadang nuntung dua iku diri menyadi ti ngujungka siku ari seduai iya bebadi nyawa ba penusah ke nyadi ba Batu 27, Jalai Lama Kuching Serian.

Menyadi tuai iya semina ulih merati enggau ati sinu pengudah motosikal ke ditepan seduai tepawah.

Penusah tu nyadi urung pukul 11.15 pagi kemari, ngujungka Mohd Jap Junaidi, 22, bebadi nyawa ketegal balat bakal ba pala lalu menyadi tuai iya, Jeffery Junaidi,24, semina telih mimit ba kaki kanan.

Ketuai Opis Pemansik enggau Penerit Adat Trafik Sarawak Superintendan Alexson Naga Chabu ngenuku penusah nya, madah dua iku diri menyadi nya asal ari Kampung Lintang Baru, Jalai Kuching-Serian.

“Nembiak ke bebadi nyawa tu nepan motosikal begulai enggau menyadi tuai iya ari Pasar Tapah nuju Kampung Panchor Dayak tepawah maya mansa jalai ke betiku.

“Nembiak nya balat bakal ba pala sepiak kanan lalu dikenuku raban paramedik ari Sepital Serian mutus seput ba palan penusah nyadi,” ku iya nengah sebengkah penerang kemari.

Alexson madah kededua nembiak nya bela enda nguna topi kelidar.

Bangkai nembiak nya dibai ngagai Sepital Serian lalu dipansik nitihka Seksyen 41 Akta Pengangkutan Jalan.

ENDA DISADANG : Menyadi tuai mangku menyadi biak iya ke balat bakal ba pala sebedau ke mutus seput ba palan penusah nyadi.