▪ TUSUN KETIGA

BAKA tu udah disemaya, kitai deka nampung pejalai ba Rumah Temuai Patrick Libau.

Sekali tu, kitai deka ngenang budaya enggau pemakai asal ti nyadi kedap enggau pengasai idupka Rumah Temuai Patrick.

Ba mayuh palan dagang temuai, peneleba budaya mai reti siti peme rindang tanda ti dipandang pengelama sepuluh minit, begambar, udah nya semua orang pulai ke bilik diri empu.

Pekara nya dipeda semina autentik ba kamira, tang nadai entu bisi kenang ke nyengala dibai bala temuai sebedau pulai ke menua diri.

Ba Rumah Temuai Patrick, cherita bebida ke alai budaya ukai semina peme rindang, tang mega kedap ngidupka tеtiap suku rumah panjai, pemakai enggau budaya ungkup bala temuai.

Ba ruai rumah panjai, bunyi tawak nyarit didinga digemar enggau bunyi engkerumung ti dipalu belubah nitih ke rentak lalu peranak Rumah Patrick ti udah bekenaka Ngepan Iban belabuh angkat ngajat.

Pemansah ajat indu enggau lelaki Iban ngasuh bala temuai labuh pengerindu lalu bisi mega angkat sama ngajat kelai pengaga ati begulai berami enggau bala peranak rumah panjai.

“Ba ditu, kami meri peneleba chukup berega baka Ngajat Iban.

“Kami mega bisi mandangka chara nyendia pemakai asal lalu bekunsi sejarah sereta pesaka asal Iban.

“Bemacham pemakai asal ulih disepi bala temuai baka pansuh ikan enggau manuk, sarang semut, pengangan ria, kuie chap enggau ke bukai.

“Bala temuai mega ukai semina ulih nyepi pemakai nya, sida mega ulih sama belajar manduk pemakai asal,” ku Tuai Rumah Patrick.

NGAJAT

Engka bala temuai mayuh enda nemu, Ngajat tu udah diaku Opis Pesaka Asal Menua nyadi Pesaka Asal Budaya Enda Nyengala Nasional Malaysia ba taun 2007.

Ari aku tu mujur ngangkatka tanda nya seikang enggau pesaka budaya menua ke bukai.

Premier Sarawak, Datuk Patinggi Tan Sri Abang Johari Tun Openg kala nyemetak madahka Perintah Sarawak enda kala nejuka pengawa budaya rayat menua taja pen bеnung ngemansang ekonomi digital.

Tambah mega, iya minta sida ti anda begulai ngintu budaya asal dikena ngelati identiti budaya nengeri.

Kebendar, pengeran ngelati identiti nya nyerangkung sukut jаku.

MINTA BEREKAT

Miring tu mega diaku bisi pengulih besai dikenuku nyadi Pesaka Budaya Enda Nyengala ba renggat nasional lalu udah nya dipedishen dike nuku ari baru UNESCO.

Nya kebuah, Opis Menteri Dagang Temuai, Seni enggau Budaya (MOTAC) nengah Opis Pesaka Menua patut ngazet pengawa tu nyadi Pesaka Nasional dulu ngambi ulih didokumentasyen, dijaga enggau dikelaku nyerangkung semua, terang iya.

Aaron madah, nitih ke Akta Pesaka Nasional 2005 [Akta 645], Pesaka Enda Nyengala ti mandangka pengawa, pengasai ati, pemenu sereta budaya komuniti ti ngembuan reti estetika, sejarah enggau identiti ngagai menua.

Pesaka tu, ku iya, mungkur mayuh bansa tradisyen ti ditampung lalu nyadi kelai mandangka pemanah ulah komuniti Malaysia ti diu pupu bansa.

PESAKA BUDAYA

“Opis Pesaka Menua mega majak negapka pengawa mulai ke pemanah enggau nyaga pesaka ti enda dipeda nengah empat unit besai iya nya Adat enggau Budaya, Seni Pemerindang, Jaku Enggau Nga Ngarat Sereta Seni Alus enggau Kraf.

“Semua elemen tu ngesan pangka pengawa ti beguna nentuka pesaka budaya menua meruan enggau dipeduka rebak dudi,” ku iya.

Aaron ti mega Kaban Parlimen Kanowit madah, pengawa nyaga budaya Dayak udah ngayanka timbal positif lebuh ngikut dokumentasi nyadi Pesaka Nasional dalam taun 2007.

Ku iya, pengawa ngenuku tu ngayanka pengeran menua ngelati budaya peranak asal nyadi sebagi ari identiti nasional.

Iya nyemetak madahka pesaka budaya enggau identiti komuniti pupu bansa di menua tu patut terus dijaga ngambi enda lenyau diserunyut arus pemansang jeman moden.

Nipak aspirasyen Malaysia MADANI, iya madah, Opis Menteri Penerayuk Menua naka ulih negut kaul penyerakup nasional, nyaga pengelantang antara pupu bansa sereta negap integrasyen komuniti.

Pengerami baka Gawai Dayak, ku iya nyemetak, nyadi pelasar ti beguna ngerapitka kaul rayat, bela mereti, bebasa sereta ngangkatka tikas pechaya ke pangan diri.

“Ba dunya ti majak mayuh pemar tu, penyerakup enda ulih dipedika empelita.

“Kitai patut seruran bepegai ngagai rеti bebasa ke pangan diri, bekait asuh enggau runding ti ulih idup begulai.

“Kitai enda ulih pambar, kitai meseti Segulai Sejalai laban,” ku iya.

PELABUH

Pengudah duduk begulai ba ruai, diatu kitai mansang ke pelabuh ti ngundan siti da cherita.

Ba pelabuh tu mih kitai deka meda lengka agi pendiau pengidup peranak rumah panjai.

“Pemakai asal ti nyadi pematak bala temuai iya nya manuk pansuh enggau ikan pansuh.

“Ba pelabuh tu mih bala temuai deka dibai begulai manduk pemakai ngambi sida sama mereti ke chara mela enggau manduk pemakai nya.

“Kami mega bisi manduk pemakai bukai baka kemiding, paku, entekai enggau pemakai bukai ti jarang diempa bala temuai.

“Pengidup diau ba rumah panjai chukup nyamai laban asal bagas nurun ke tanah, sigi bisi aja utai diulih kitai,” terang iya.

Pemakai baka manuk pansuh ditu mega dikemegah laban udah diangkat ba renggat antarabangsa.

Menteri Dagang Temuai, Seni enggau Budaya, Datuk Seri Tiong King Sing madahka Kuching diaku nyadi Mengeri Kreatif Gastronomi UNESCO keterubah Malaysia.

Iya mega madahka nya pengawa ngaku ti global ngagai pesaka kulineri menua ke alai manuk pansuh dirintai begulai enggau Laksa Sarawak sereta Kolo Mi ti nyadi pemakai ngayanka pengaya pesaka asal tu.

“Pemakai tu mega mandangka identiti etnik Iban laban nya pesaka ti ditampung ari tubuh aki ini kitai kelia nyentuk diatu.

“Chara manduk ngena buluh bisi kaul rat peranak asal rampa menua sereta chara pengidup ti jеlan tang kaya enggau reti tradisyen,” ku Tuai Rumah Patrick nyemetak.

Kaban Kunsil Nengeri (ADUN) Kota Sentosa, Wilfred Yap Yau Sin mega kala nyemetak madahka pemakai nya sukat beguna meri peneleba budaya enggau dagang temuai nyadi siti ari chara matak temuai ke Sarawak.

Buah penemu nya setipak enggau baka ni manuk pansuh nyadi entara bansa pemakai ti suah ditapat bala temuai lebih dulu bemalan ba Rumah Temuai Patrick kelimpah ari nemuai ngagai Gua Niah.

Nya alai, pesaka asal nya semina mengkang idup seagi majak dikemeran lebih agi lebuh bala temuai makai manuk pansuh tauka meda pengawa Ngajat.

Kebuah pia laban sida ukai semina begambar kenang, tang mega netuka rebak biak Iban terus berati ke pemesai rеti nampung tradisyen sida, disukung pengawa ngaku ti diatu ukai semina datai ari temuai tang mega ari UNESCO enggau Perintah Sarawak empu.

Ba kenang udah tu, kitai deka ngenang pemar ngemansang rumah temuai sereta empat ekonomi enggau pemeruan ti dibai peranak menua pesisir Sarawak.

▪ BETAMPUNG