MIRI: Pengerami Ngiling Bidai Gawai anjuran Serakup Apai Indai enggau Pengajar (PIBG) Sekula Primari (SK) Sungai Arang begulai enggau komuniti Kampung Sungai Arang bejalai enggau chukup meriah enggau besai reti dalam ngerapatka kaul entara bala pengajar, nembiak, apai indai enggau peranak menua di Rumah Jelaping Jali ditu, baru-baru tu.

Batang tuju pengerami nya endang dikena ngerapit kaul entara sekula enggau komuniti menua, sereta diisi enggau slot motivasyen ari dua iku pengelicha, iya nya Dr Andrew Lee Salin enggau Marvelys Micheal Dian.

Ba penemu ti dikunsi iya, Dr Andrew mantangka pemesai guna pelajar nyadi kunchi ngubah tikas pengidup siku-siku ba dudi hari. Iya mega bekunsi pejalai akademik diri nyentuk mujur nyambung pelajar ngagai tikas Doktor Falsafah (PhD), lalu ngayanka anak ari menua pesisir mega ulih nyapai pemujur enti bisi juluk, disiplin enggau pengeransing belajar.

“Kitai ari menua pesisir pen tau mujur ba pelajar enti bisi juluk, disiplin enggau pengeransing ngulihka penemu baka orang bukai.

“Nya alai, aku ngelalau bala nembiak enda mudah mantul ngulihka juluk ati sereta seruran ingatka pengiruh apai indai ti nyengulaka sida datai ngagai pemujur,” ku jaku lalau Dr Andrew.

Seraya nya, Marvelys madah pelajar nya siti pengawa meranak puku timpuh panjai ke begunaka sukung ari semua raban, lebih agi apai indai, sekula enggau komuniti.

Iya mega madah penanggul rama baka salah guna dadah enggau judi dalam talian ti majak ngirauka ati laban pemayuh kes nyadi kemaya hari nitih dipadah ba surat berita.

“Berindik ari nya, apai indai patut regas ngembing, nyeridi enggau matau pengawa bala anak ngambika enda tepejuh ngereja pengawa enda manah ti tau nekul pengidup sida jemah,” ku iya.

Ba pengerami ke sama, Chairman ADC Sungai Arang, Clarence Nanang, madah diri deka meda mayuh agi anak Sungai Arang nyapai penyulut ba akademik.

“Aku ngarapka dalam tiga taun deka datai, bisi agi anak Sungai Arang ditu mujur nyambung pelajar nyentuk PhD ngambika tau nyadi teladan enggau peransang ngagai rebak dudi.

“Kelai meri sukung enggau peransang ngagai rebak biak ngambika ransing belajar, aku deka meri insentif mata duit ngagai sebarang anak Sungai Arang ke mujur enggau nyulut ba akademik.

“Kebuah pia laban aku nemu pelajar tu pengawa meranak puku ti pemadu nguntungka pengidup kitai ba dudi hari, nyengkaum orang sebilik enggau komuniti menua.

“Pelajar tu meh penyungkak ngagai pemansang peranak menua pesisir ngambika mansang agi sereta ulih besemekih enggau orang bukai, nadai ngira ba pengidup tauka ba pengawa,” ku Clarence.

Pengerami sehari nya mega meriah enggau pengawa miring, pemerindang Ajat Ngalu Temuai, lumba rama komuniti, ngetas ranyai sereta simbolik Ngiling Bidai kena nutup Gawai Dayak taun tu.

Raban pengatur pengerami ngarapka program ke sebaka tu ulih ditandu ba dudi hari nyadi pelasar ngerapatka kaul penyerakup komuniti, nambah penemu pasal pekara kemaya hari sereta meri peransang ngagai rebak biak terus nempa penyulut ba pelajar enggau pengidup.

Sama datai, Kepala Pengajar SK Sungai Arang, En. Mohamad Salehudin Semain; Pegawai Pemadah Marudi, Juliana; Cr Wahed; enggau Tuai Rumah Jelaping Jali, ke sama nyukung pengawa ngelati pelajar enggau pemansang komuniti menua.

Pengerami nya ngayanka kerejasama erat entara raban sekula, apai indai enggau komuniti dikena nempa rebak ti bepenemu, manah ulah enggau ulih napi pemar ba dudi hari.