KUCHING: Rayat Sarawak patut ngambi musin Hari Krismas tu nyadika awak ngagai sida ‘belelak sereta ngeregas diri’ baru dikena nyendiaka diri napi Taun 2025.
Dalam siti kunsi video serimbai Hari Krismas, Sapit Premier Sarawak Datuk Amar Dr Sim Kui Hian madah ke iya meda taun 2025 nyadi taun ti beguna ungkup Sarawak laban nengeri tu benung ba tengan pejalai bejalaika Strategi Pemansang Pengudah Covid-19 2030 (PCDS 2030) ti ngemeratka pengelantang, inklusiviti enggau pemanah rampa menua.
“Ngarapka hari pengaga tu mai ruang bilik begulai ngerapitka kaul, ngetanka ulah manah diri sebilik sereta berami mantaika pemakai ti manah,” ku iya bejaku dalam siti pesan video Hari Krismas ti dipasukka ba media rama iya empu.
Dr Sim ti mega Menteri Pengerai Mensia Mayuh, Pengawa Berumah enggau Perintah Lokal mantaika pemesai guna inklusiviti dikena beratika penguntung pengaya Sarawak ti udah berengkah dikunsi enggau rayat.
“Nya nyengkaum duit belanja ungkup nembiak universiti Sarawak, e-voucher belanja pemakai ti meri penguntung ngagai 850,000 iku rayat Sarawak enggau inisiatif bukai,” ku iya ti meha Kaban Kunsil Nengeri (ADUN) Batu Kawah.
Ba jaku nya, Kui Hian ngelalau rayat Sarawak awakka terus beserakup sereta nentuka penegap politik, ngambika ulih nyaga pengelantang enggau penatai pemisi nengeri tu.
“Nengah penyerakup enggau penegap nya, kitai ulih nyapai PCDS 2030 lalu nempa Sarawak nyadi menua pemadu manah jeman ke mua,” ku iya.
