KUCHING: Sekeda pekara ba randau ti apin diputus di baruh Sempekat Malaysia 1963 (MA63) deka diputar ba Aum Komiti Teknikal MA63.

Menteri ba Opis Menteri Besai (Sabah enggau Sarawak), Datuk Ts. Mustapha Sakmud madah, aum nya ditaga diatur 28 Februari tu dilanjar ngagai 2 March ila ketegal bisi penanggul enda ulih diseliah.

“Bisi sekeda pekara empai teputar ba randau diatur lalu pekara tu mih ti deka diputar kitai.

“Nya alai, kitai nguji berandau ba komiti teknikal dulu, lalu sebarang pemutus ari komiti teknikal tu deka dibai ngagai komiti besai ila sereta nya deka diputus ba haribulan enggau maya ti engkeman,” terang iya.

Mustapha nerang pekara nya lebuh dirandau pengudah Jaku Tangkan Begulai Enggau Tuai Opsi enggau Ejensi Perintah Besai di Sarawak ti diatur di Begunan Sultan Iskandar, ditu, kemari.

Ngenang petisyen ti dianjung Perintah Sarawak ba Kort Perintah Besai kemari dikena nuku konstitusyen enggau ngena Akta Pembangunan Petroleum 1974, Akta Pelantar Benua 1966 enggau Akta Perlombongan Petroleum 1966 (Akta-Akta Persekutuan) ngagai Sarawak, Mustapha madah ke diri bebasaka pengawa nya.

“Aku enggai mansutka sebarang penemu tang ba runding aku, kitai bebas enggau teju ngagai kort nentu belalauka undang-undang ti bisi enggau mega fakta ti bisi diatu,” ku iya nyemetak.

Dulu ari nya lebuh bejaku ba mua mayuh, iya madah ke mayuh pemujur dijapai sekumbang betuai ke Perintah MADANI, ti nyulut ba atur pengawa enggau pejalai MA63 kenyau ari dipun chara berurun 10 taun ti udah.

Naka diatu ku iya, bisi 29 pekara MA63 udah dikerandau nengah Kaunsil Pengatur Pejalai MA63 (MTPMA63), enggau 13 ari pekara nya mujur diputar, semilan di baruh Perintah MADANI lalu empat da di baruh perintah sebedau tu. — NICK FLETCHER