Novel Atas Nama Pengerindu: Cherita ti nyadi ba dunya nyata

Novel ke diberi nama Atas Nama Pengerindu dikarang bepelasarka leka lagu kelimpah endang pekara ti amat nyadi ba dunya nyata entara dua iku kaban Polis iya nya Daniel enggau peraja mata iya, Nur Ayda.

Novel tu nyeritaka pejalai pengerindu entara Daniel enggau Nur Ayda ti diuji enggau bemacham penguji ketegal ti enda sama bansa enggau pengarap sekumbang seduai ti besulu.

Ngelansa jalai cherita ba novel tu, orang ke benama Nur Ayda dalam novel tu ditusui siku indu ti mentas sereta ngembuan basa ti chukup manah ngagai semua orang lalu ba jam ke sama ati iya suah dikeduan Daniel.

Tang ketegal pementas iya sanggup ngampun semua penyalah ke udah dikereja bujang tampun puji ambai ati diri (Daniel) nyentukka Daniel sanggup bekeradai enggau sebarang chara dikena iya ngumbuk ngicha pemulai iya ngagai Nur diterima baru.

“Nur Ayda ba Novel tu iya nya siku indu ti chukup pengampun lalu sanggup nanggung semua penyalah enggau penyilap ke udah dikereja Daniel, ukai mina sehari dua tang nyau sampai betaun-taun.

JERRYSON CHUA…Penulis novel Atas Nama Pengerindu.

“Cherita dalam novel tu endang cherita dalam pengidup ti amat nyadi ba dunya nyata,”ku Jerryson Chua madah ngagai penulis.

Lebuh ditanya silik bekaul enggau buah runding mungkal nulis novel tu Jerryson madah, buah penemu nya datai pengudah ninga lagu Atas Nama Pengerindu ke disadaka Raban Band D’Crystal ti benung hitz jam ke diatu.

“Aku begunaka awak dua hari dikena aku berunding sebedau nulis novel tu.

“Kelimpah ari nya, aku mega bekerejasama enggau Pierce Lee ke mega pemain gitar Band D’Crystal dalam ngenukuka jalai cherita novel tu.

“Nuju mensia mayuh lebih agi peminat Band D’Crystal empu ba luar dedin enti deka nemu enggau silik pengujung cherita pengerindu entara Daniel enggau Nur anang enda meli udah tu ila,”ku Jerryson.

Penerang silik ulih betelefon nuju Julius Mawan Libau.

Nambah nya ku iya,meri besai terima kasih ngagai semua bakih dalam raban Band D’Crystal laban udah mayuh nulung aku lebih agi ari sukut belanja dikena nyetak novel tu.

“Meri besai terima kasih nuju semua bakih D’Crystal ketegal ari bantu nya mih ti ngujungka novel Atas Nama Pengerindu tu ulih mujur baka sehari tu,”ku iya ti mega ngembuan juluk ati deka nyadi penulis novel ti sama ikas enggau penulis bansa bukai ba selampur menua tu.

Jerryson Chua,26 taun asal ari Sungai Poi, Kanowit ke mega anak tuai ari tiga iku diri menyadi diau mendam di Sibu Jaya ke mega mayuh udah ngarang novel.

Entara novel bukai dikarang sebedau tu iya nya Betachah,Ngelawai Neraka Tuai enggau Diantara Titi Rawan.

Novel tu dichetak Kompeni Narangkai Publications di Keningau Sabah tu disadang dijual ngagai mensia mayuh nengah Online abis laun ba tengan bulan March tu.

Sebarang sapa ti bisi ati deka ngudar meli bup novel Atas Nama Pengerindu tau betelepon terus nuju Julius Mawan Libau ba lumur 0111-4619311.