MIRI: Festival seni enggau budaya bisi pengulih nyadi penyungkak negapka ekonomi kreatif enggau sektor dagang temuai Sarawak tumbuh lalu ngangkatka nengeri tu nyadi palan budaya besai di rantau tu.

Sapit Menteri Dagang Temuai, Industri Kreatif enggau Seni Pemerindang Sarawak, Datuk Sebastian Ting Chiew Yew madah, Sarawak ke kaya enggau pengelain budaya, pengawa asal enggau ekspresyen seni patut terus dibantai nengah mayuh agi program besai empas.

Ku iya, inisiatif negapka industri kreatif belama ukai semina ngintu pesaka budaya nengeri aja, tang mega ngerandang peluang ekonomi baru ngagai komuniti seni enggau pemekuh industri kreatif lokal.

“Festival baka tu ukai semina mandangka penyelai budaya Sarawak ngagai pengusung aja, tang mega mantu ngeranchak sektor dagang temuai enggau ekonomi kreatif nengeri.

“Tu meri asil besai ngagai pemansang sektor dagang temuai, matak pengusung datai sereta ngentapka agi penuduk Sarawak nyadi palan budaya tebilang di rantau tu,” ku iya.

Iya nyebut jaku nya lebuh bejadi Sarawak Arts, Crafts & Music Festival 2026 ditu, Hari Enam.

Kaban Kunsil Nengeri (ADUN) Piasau nya madah baru, festival baka nya mega nyadi pelasar beguna ngelaku pesaka budaya Sarawak kelimpah nyukung pemansang komuniti kreatif lokal.

Ku iya, nya ngempuruka bala artis, pemekuh seni pemerindang enggau pemekuh industri kreatif ari mayuh menua lalu ngerandang peluang besilih budaya, inovasyen sereta ngenang seni pesaka. – EDISI UKAS