KUCHING: Langgur ubah Ordinan Kot Bumiputera 1992 diatu benung ba tikas diserenih Opis Luyar Besai Sarawak.
Menteri ba Opis Premier Sarawak, Dato Sri John Sikie Tayai madah, pengawa nya beguna dikena nentuka ubah ke dilanggur ulih digaga sereta nipak guna enggau penguji ke benung ditapi Kot Bumiputera Sarawak.
“Tu besai reti dikena ngenegapka agi institusyen Kot Bumiputera Sarawak sereta nyukung pengawa ngatur enda bechiping,” pia ku iya.
Iya nerangka pekara nya ba aum media sepengudah ngenataika jaku simpul ari opis menteri iya maya Aum Kunsil Nengeri (DUN) Sarawak Ke-19, Hari Satu.
Kelimpah ari nya, Dato Sri John Sikie meri jamin alai Perintah Sarawak seruran chakah nentuka ubah ke dilanggur nya deka nyaga adat enggau daya idup Bumiputera.
“Seraya nganti ubah nya diputus sereta diteritka, Kot Bumipuera Sarawak semampai bejalaika pengawa ngena langkar undang-undang baka ngelama tu,” ku iya madah baru. — EDISI UKAS
