KUCHING: Bisi 1,059 peminta penuduk baru Tuai Raban Bansa enggau Genturung Pendiau (KMKK) ari selampur Sarawak diatu benung diserenih.
Menteri ba Opis Premier Sarawak, Dato Sri John Sikie Tayai madah, semua peminta udah diterima ari mayuh sitak di nengeri tu ke benung diserenih sebedau digagaka pemutus.
“Beberapa bengkah pekara deka dikira nyengkaum pemesai menua ke dipegai, penyampau tubuh peranak ke nambah enggau rumah sereta genturung pendiau baru,” pia ku iya.
Iya nerangka pekara nya ba aum media sepengudah ngenataika jaku simpul ari opis menteri iya maya Aum Kunsil Nengeri (DUN) Sarawak Ke-19, Hari Satu.
Kelimpah ari nya, Dato Sri John Sikie madah, pekara bekaul penusah ngelawa menua lebih agi menua ulu ke semina ulih dilawa ngena bilun, sungai tauka penanggul jalai darat bela dikira.
Iya madah, menua ke bebukit sereta betakah jauh enggau pangan diri mega deka diperunding ditambahka penuduk KMKK ke baru. — EDISI UKAS
