GEDONG: Perintah Sarawak udah ngungkupka belanja sepenyampau RM200 juta taun tu dikena melaya bai mayur nampung pelajar 10,800 iku peranak Sarawak nengah Skim Pelajar Tinggi Petuhma (FTES).

Premier Sarawak, Datuk Patinggi Tan Sri Abang Johari Tun Openg madah, skim nya meri peluang ngagai peranak Sarawak ari ruang bilik kurang penatai pemisi nyengkaum anak orang bukai enggau berikan nampung pelajar ba tikas universiti.

“Taun tu, kitai udah nyediaka agih belanja sepenyampau RM200 juta, dikena melaya bai mayur nampung pelajar 10,800 iku nembiak ba palan pelajar tinggi,” ku iya.

Abang Johari bejaku munyi nya rambau bejadika Program Pejalai Ngepunka Program: Siku Tuai, Siti Genturung Pendiau enggau Pengerami Berambah ba Gedong ditu, kemari.

Ku iya, skim nya mungkur 64 program bepelasarka Sains, Teknologi, Injiniring, enggau Matematik (STEM) sereta bidang bukai baka industri bank, pekara wang, psikologi enggau bidang bekaul mensia.

“Reti nya, anak ari raban B40 enggau M40 nyengkaum anak orang bumai enggau berikan semula bisi peluang, nengah atur sida diterima tama universiti lebih nampung pelajar,” ku iya.

Ba pemansang bekaul, iya madahka Bajet Sarawak ba taun baru penyampau RM14 bilion, ke alai penatai pemisi nengeri ba taun 2027 dilepaka urung RM15 bilion.

“Nya mandangka penyampau ti signifikan dalam sejerah kitai,” ku iya.

Abang Johari madah, penduduk wang nengeri tu nyulut bekau ari chara ngatur ekonomi ti namah sereta chara melania ti bekelimat.

“Ba penduduk fiskal, kitai enda bebelanja sepeneka ati, kitai bekelimat, lalu kitai mega netapka belanja ungkup jemah ila nengah Turu Pesaka Bansa,” ku iya.

Ku iya, turu ti diperambu enda dikena ba timpuh 20 taun, awak ulih nambah sereta meri penegap ba pekara wang ngagai Sarawak jemah ila.

“Belanja tu deka mengkang enda dikena pengelama 20 taun ngambi iya ulih mansang sereta meri pengelikun pekara wang ngagai nengeri Sarawak jemah ila,” ku iya.