LUNDU: Perambu numbuh palan bedaja enggau marina semak Jematan Batang Kayan dikeakap ulih nyungkak peluang ekonomi sereta nyadi pematak dagang temuai ba Zon Sampadi.

Kaban Kunsil Nengeri (ADUN) Tanjong Datu, Azizul Annuar madahka perengkaguna tu bisi pengulih nyadi penyungkat aktiviti seraya ngidupka baru kandang endur ngelingi jematan nya.

Iya beratika pemansang Lundu enda ulih semina meri perati ngagai infrastruktur aja tang mega mungkur peluang ekonomi, pelajar, latih pengelandik, dagang, rentayan penyambung digital, sereta nyaga pengelantang pengidup rayat.

“Nyadi rayat Lundu, kitai ngesan tanggungpengawa nentuka pelilih tu terus mansang nunda penyulut Sarawak,” ku iya rambau nutup Regata Sungai Batang Kayan, ditu, kemari.

Ku iya baru, pemansang ti meruan semina ulih dijapai nengah pengeransing enggau kerejasama begulai ari perintah, komuniti, sektor peribit, orang dagang, raban nembiak, enggau mensia mayuh.

Azizul Annuar mega ngemeratka pemesai guna meri kuasa ngagai raban nembiak ngesan tanggungpengawa meransang pemansang Lundu, kelebih agi ba bidang dagang, teknologi, ekonomi digital, industri kreatif, lumba enggau main sereta dagang temuai.

Iya madahka penyulut ukai dekaka komuniti ninggalka pesaka asal sida, tang reta tengkira menua tu ulih diintu sereta dikena nyadika pengering dikena nempа pemansang jemah.

“Batang Kayan nyadi sebagi ari sejarah enggau pengidup komuniti Lundu.

“Sungai tu nyadi sebagi ari gaya pengidup komuniti ditu kenyau ari suba.

“Diatu, Batang Kayan nyadi palan ti ngempung komuniti nengah lumba enggau main, main asal, penyerakup, sereta semangat begulai enggau pangan diri,” ku iya.

Iya madahka Regata Lundu Sungai Batang Kayan 2026 mega mantaika pengulih sungai nyadi sebagi ari identiti enggau matak komuniti menua.

Pengawa ke diatur pengelama tiga hari nya ukai semina ngatur lumba perau aja tang mega ngatur mayuh macham aktiviti baka pemandang enggau pengawa bejual, Program Bejual Rahmah, pekit pemanah, lumba enggau main asal, konsert mensia mayuh, enggau Lundu Heritage Square Fest.

Batang pengerami Regata Batang Kayan mandangka bemacham kategori lumba, nyengkaum Trofi Parlimen Santubong P193, Trofi ADUN Opar N.01, Tanjong Datu N.03, sereta Trofi Raja Sungai ti dianti mensia mayuh.