KUCHING: Opis Menteri Pemansang Indu, Nembiak Mit enggau Pengelantang Komuniti (KPWKK) deka ngelala palan ti strategik agi ungkup Palan Transit Kampar (TTG) di Kuching dikena negap pengawa ngintu kampar.

Menteri KPWKK, Datuk Seri Fatimah Abdullah madah, pekara nya diguna berindik ari penanggul ngiga premis ti engkeman sebedau tu ngujungka palan nya diatu beoperasyen ba begunan suwa sementara.

“Naka diatu, kitai ngena premis suwa ti diserara entara lelaki enggau indu.

“Taja pen palan nya apin engkeman, operasyen tetap dipejalai seraya kitai ngiga endur ti engkeman enggau strategik agi.

“Entara ti dikemerat kitai iya nya sukut pengelikun laban bisi kes sebedau tu nyengkaum di Sibu, kampar nyau dijamah ketegal tinduk ba kaki lima,” ku iya.

Fatimah nyebut jaku nya ba Pengerami Begulai enggau Peranak sereta Pengatur TTG Kuching ba rumah iya di Jalai Bakti, malam kemari.

Ku Fatimah, pengawa numbuhka TTG nya sebagi ari inisiatif begulai Perintah Sarawak mutar isu kampar, bepun ari operasyen nyelamat ti dikemujur mayuh ejensi.

“Kitai (Perintah Sarawak) keran nentuka TTG ba nengeri tu ulih beoperasyen manah ngena fasiliti ti lantang enggau likun agi.

“Baka TTG ba Sibu, kitai mega bisi begunan ti diubah nyadi palan operasyen ngintu kampar tu,” ku iya.

Kelimpah nyendia palan nyaga, ku Fatimah, TTG mega nyadi palan beperesa pengerai nyengkaum meresa penyakit enda berampit baka tinggi darah enggau kemi manis kelimpah dianjung ngagai fasiliti pengerai.

Berebak enggau nya, ku iya, program pemasang kapasiti mega dipejalai nyengkaum latih pengelandik enggau sukung nyendia peluang gawa.

“Kitai deka raban kampar dibasa enggau enda dikemelu, nipak inisiatif perintah nentuka sida ulih ngati kediri,” ku iya.

Nya alai, iya madah, inisiatif negap TTG ba nengeri tu mandang pengeran Perintah Sarawak nentuka isu kampar diputar meruan.