LAWAS: Pemansang nyendia pam melepung nyadi chara timpuh pandak Perintah Sarawak mutar penanggul pasir betugung ba palan ngambi ai ti ngujungka peranak di Lawas napi penanggul bekal ai tejanggal.

Sapit Premier Sarawak, Datuk Amar Awang Tengah Ali Hasan madahka pengawa nya dipejalai seraya nganti projek nambah kapasiti tangki ai enggau pemansang sistem ai baru disedia ungkup timpuh panjai.

“Isu bekal ai di Lawas majak diperati perintah nentuka peminta peranak ulih ditangkup nengah atur lengkas enggau langgur pemansang infrastruktur ti manah agi,” ku iya. Awang Tengah madah munyi nya lebuh bejadika Pengerami Lawas 2026 di Tebing Ai Lawas, ujung minggu tu tadi.

Kelimpah ari bekal ai, pemansang infrastruktur di Lawas enggau Limbang mega ditegap nengah pengawa bejalaika projek Jalai Besai Tebing Tasik Utara, Padang Bilun Baru Lawas sereta nambah rentayan pengangkut darat, tasik enggau langit. Iya madahka kededua endur nya bisi pengulih besai dikemansang nyadi hab betanam betupi, kelebih agi tibang padi enggau nupi kerebau, kelimpah ari sektor dagang temuai bepelasarka rampa menua sereta industri minyak enggau gas.

Iya madah baru, pemansang modal mensia meseti terus ditegap ngambi tetangkupka peminta sektor ekonomi baru nyengkaum ekonomi digital, energi ulih dikena baru, industri semikonduktor, minyak enggau gas sereta aktiviti ekonomi baruh karbon.

Nangkan nya, pengawa ngatur baru Pengerami Lawas pengudah berapa taun mega meri peluang ngagai pedagang mit enggau agensi bekaul ngelaku produk sereta servis, kelimpah negut kaul kerejasama entara agensi perintah, gerempung ukai dikuasa perintah (NGO), sektor peribit enggau komuniti menua.

Terang iya, pengerami nya ukai semina ngidupka baru aktiviti asal komuniti, tang mega nyadi pelasar nyempil kaul enggau negut penyerakup entara rayat pupu bansa, pengarap enggau budaya.

Iya madah baru, Pengerami Lawas nya pelasar nyempil kaul bebakih entara komuniti sereta negap semangat beserakup enggau kerejasama entara pangan diri.

Nya alai, iya ngarapka pengawa ngatur pengerami nya ulih ditampung besai agi nyengkaum ari Brunei Darussalam, Sabah, Labuan enggau endur bukai.

Bela datai, Sapit Menteri Industri Pemakai, Komoditi enggau Pemansang Kandang Menua Sarawak, Datuk Dr Abdul Rahman Ismail; Kaban Parlimen Lawas, Datuk Henry Sum Agong; Menteri Perintah Lokal enggau Pengawa Berumah Sabah, Datuk Dr Mohd Arifin Mohd Arif; Sekretari Mendam Opis Menteri Dagang Antarabansa, Industri enggau Meranak Puku Sarawak, Datuk Lester Matthew; Konsul Jeneral Republik Indonesia, Dr Abdullah Zulkifli’ Residen Bagi Menua Limbang, Unus Tambi; Tuai Pegawai Eksekutif Opis Dagang enggau Dagang Temuai Sarawak di Brunei Darussalam (STATOB), Samad Junai sereta Direktor Kampung Sarawak, Datuk Hamden Mohammad. – EDISI UKAS