BINTULU: Asil penatai pemisi Sarawak manggai RM15 bilion ba taun 2027 deka nambah penau perintah nengeri nambah bantu pengelantang, pelajar sereta pemansang infrastruktur ke pemaik rayat.
Sapit Premier Sarawak ti nyadi Menteri Infrastruktur enggau Pemansang Penyangkai Kapal Sarawak, Datuk Amar Douglas Uggah Embas madahka inisiatif nya nyerangkung bantu ngagai anak mit ti baru ada, nembiak sekula, nembiak palan pelajar tinggi (IPT) sereta orang tuai.
“Kebuah pia laban pengawa nyungkak ekonomi enggau pengelantang rayat mengkang dikemerat Perintah Gempung Parti Sarawak (GPS), ke alai pelajar enggau pemansang infrastruktur terus diperati ba agenda pemansang nengeri,” ku iya.
Uggah madah munyi nya ba Sesyen Randau, ditu Hari Minggu tu tadi. Ba sukut pemansang infrastruktur, iya mega nyebut pengawa ngaduka jalai batang, nyengkaum jalai di Tatau dikena nambah akses penyambung enggau ngemuntang pejalai peranak menua.
Bela datai, bala Sekretari Politik Premier Sarawak, Paulus Dandee Banyang enggau Petrus Igat Matias. – EDISI UKAS
