Pandelela Rinong fokus Lumba Olimpik Tokyo

KUCHING: Atlit terejun menua, Pandelela Rinong diatu fokus 100 peratus dalam ngetanka penyulut iya ba Lumba Olimpik Tokyo kenaka bulan April tu ila.

Iya madahka awak beberapa bulan agi endang mayuh dikena matih diri ba pekit terejun di menua luar.

“Awak aku kediatu endang mayuh diguna belatih ba menua luar baka di menua China.

“Bisi tiga bengkah pekit ti deka disereta aku sebedau Lumba Olimpik Tokyo tu ila iya nya ‘Diving World Series’ enggau ‘Diving World Cup’,” ku iya.

Pandelela bejaku munyi nya lebuh ditanya pemberita pengudah nerima sebuah unit rumah (apartment) di P’Residence ba Batu Kawa ditu, kemari.

Ku iya, nembiak baru ti deka nempa nama ba sebarang lumba enggau main patut ngembuan pengeransing ati deka maju.

“Tama dalam dunya lumba ukai pekara ti muntang, tang kitai anang putus pengarap taja mayuh macham pemar ti datai nuntung.

“Siku atlit patut ngembuan ati ti kering napi penguji lalu terus sabar ngambika juluk ati ulih dijapai,” ku iya.

Iya mega meri pengaga ati ngagai rayat enggau Perintah Sarawak ti meruan nyukung iya ba pekara lumba nyemerai.

Suara Sarawak