SIBU: Pantun Iban ukai semina seni asal aja, tang lambang pemintar raban bansa Dayak meri jaku ajar, seriri enggau ngading pendiau ngena chara ti besilup tang chukup besai reti.
Kaban Kunsil Nengeri (ADUN) Tamin, Ir. Christopher Gira Sambang madah, genteran pantun ti disada nya lambang penajam runding enggau pengasai ati orang tuai kelia.
Ku iya, pantun nya ukai semina dikena beperindang aja, tang mansutka pengasai ati orang siku-siku nyengkaum sada leka sebana, pengelengau, penyinu, pengagit, pengeran enggau ke bukai.
“Pantun Iban tu mih lambang penajam runding enggau kreativiti aki ini kitai menya nyadaka pengasai ati enggau pengandal diri.
“Seni benyawa tu ukai semina pemerindang aja, tang dikena kitai ngajar, nangkan enggau ngempung,” ku iya nyemetak.
Gira nibar ke jaku nya lebuh dipebasa bejadika Woksyop Ngerembaika Pantun Iban 2025 ti diatur ba Rumah Rantai Ugak, Luyang Baru, Skim Sekuau ditu, ujung minggu tu tadi.
Iya madah baru, Pantun Iban ukai semina genteran jaku betimbal aja, tang manifestasyen penyelai budaya, pengeliut enggau pendiau raban bansa Dayak ti ditampung ari menya.
“Penyelai seni sada nyawa tu mih ti nyadi pugu diidupka kitai ba Woksyop Ngerembaika Pantun Iban keterubah diatur ti diperati mai reti chukup besai ba pengawa ngelatika jaku Iban empu.
“Nya alai, aku deka terus nyukung sebarang inisiatif ngerembaika main asal ngambi ulih negapka komuniti menua pesisir sereta ngetanka nilai budaya ba arus pemansang moden,” ku iya.
Penatai Gira sehari mega kelai sukung tegut ngagai inisatif nyagu Pantu Iban nyadi pesaka bansa ti patut terus idup dalam ati rebak biak.
Iya mega chukup temegah ati meda pengeransing bala penyereta kelebih agi rebak biak ngiri penemu, ngansah pengelantang sereta nadai sanggu ati betanya ngagai bala panel woksyop.
Sekumbang dua hari woksyop nya diatur, bala penyereta diajar chara nengkebang enggau meretika genteran Pantun Iban ti kaya enggau metafora sereta lalu pengidup.
Aktiviti ngajar chara nyadaka pantun, nyada pantun ngenyit, gendan pampat enggau naku buah inyak sereta main bukai sama narit ati serap umur bala mayuh ti datai.
Ke penerang, lebih ari 150 penyereta udah ngulu woksyop dua hari ti diatur Gerempung Bakat Dayak Sarikei enggau disukung Kaunsil Seni Sarawak (MSS) enggau Yayasan Tun Jugah.
